GINEBRA, SUISA, AFP.- Merka mester tuma “medidanan serio” despues di “asesinato” di un hòmber koló skur na man di agentenan polisial na Minneapolis, segun indikashon di e Komisario di Derechi Humano di ONU, Michelle Bachelet.
“Esaki ta e último di un serie largu di asesinato di afroamerikanonan desarmá kometé pa polisnan merikano i hendenan arma”, segun indikashon di Bachelet den un komunikado.
“Mi ta lamentá ku mester agregá nòmber di George Floyd na esun di Breonna Taylor, Eric Garner, Michael Brown i vários afroamerikanonan desarmá mas ku a muri den e último añanan na man di polis. Outoridat merikano mester tuma medidanan serio pa pone fin na e asesinatonan i sigurá ku hustisia lo vense”.
George Floyd, un empleado di un restorant di 46 aña, a muri den siudat di Minneapolis djaluna despues ku polis a tené durante mas ku 5 minüt ku boka abou riba suela, ku e polis su rudia di klèm riba su garganta. Un persona tabata pasando, i a graba e insidente. Por a mira klaramente ku Floyd tabatin problema pa hala rosea. Despues ku el a keda 5 minüt bou di e polis su rudia, Floyd a keda ketu. El a wòrdu transportá pa hospital kaminda a deklará su morto.
