VIENA, AP.- E paisnan miembro di OPEC a bai di akuerdo djabièrnè pa oumentá produkshon diario di krudo den 1 mion barí, un medida ku mester yuda para e oumento resien di preisnan global di kombustibel.
Sinembargo, tin vários duda riba e kapasidat di algun miembro di e kartel pa oumentá e produkshon meimei di su problemanan interno i sanshonnan.
Despues di e reunion na Viena, e minister di Energia emirato Suhail al-Mazrouei a bisa ku e kartel a disidí pa kumpli kabalmente ku su máksimo di produkshon eksistente.
Debí ku produkshon tabata bou di e nivel aki, e oumento lo ta “un tiki ménos ku 1 mion bari”, segun e minister.
O ta evidente kon esaki lo resultá den un oumento efektivo di produkshon, ya ku pa algun miembro no ta fásil pa kumpli. Iran ta sufri sanshonnan di Merka kual ta hasi eksportashonnan difísil. E produkshon venezolano a kai debí na instabilidat polítiko den e pais.
Algun analista ta sostené ku e desishon di djabièrnè ta nifiká un oumento kèsh di 600.000 barí diario.
E preis di krudo a oumentá despues di e anunsio aki. Brent, e referente internashonal a oumentá ku 1.81 dòler na 74.86 dòler pa barí.
