Ralph Winedt di Kargando Narativa; Otro siman dia 16
WILLEMSTAD.- Otro siman djaluna dia 16 di desèmber Plataforma Literario kargando Narativa ta organisá un “Open mic” Alma ta Kosta. Ta trata di un aktividat kaminda tur hende ta bon biní i por bin duna nan kontribushon. Ralph Winedt ta splika EXTRA un tiki mas di e evento akí.
Den tur nan aktividatnan, nan tin invitadonan. Den e kaso akí lo tin dos invitado ku ta Kas di Teater di hóbennan serka Albert Schoobaar i tambe tin Juan Carlos Goilo. Riba e anochi akí tambe lo tin tarima habrí kaminda tur hende por partisipá. Ku esaki Winedt a splika ku e podio ta pa tur loke ta arte riba tarima esta baile, músika,literatura i rèp.
E aña akí e evento lo tuma lugá na playa na Piscadera/Parasasa i e tema e bia akí lo ta algu ku ta reina den pueblo i esei ta playanan. Tin hopi desaroyo aktualmente i nan ke laga pueblo su bos resoná di loke ta pasando.
Ya tin 3 aña kaba ku e plataforma ta organisá tur tipo di inisiativa rondó di literatura, manera tayernan, anochinan produsí ku artistanan ku a ensayá i e Open Mic ta popular pasobra e ta aksesibel pa tur hende. Tin bia bo ta haña artistanan ku ta presentá pa promé bia i ta bin dilanti sentimentunan ku ta bibando den komunidat.
Winedt a bisa ku e idea ta pa hasi arte demokrátiko pasobra tin bia e por ta literario pa esnan eksitoso kaba i nan ta haña podio. Ta e idea pa tur hende sinti nan konfortabel pa kompartí algu i e ta un espasio ku nan ke skucha loke tin di bisa i konta. Arte ta un vehíkulo pa protesta, pa laga bo bos resoná i arte ta mas efektivo ku asta akademia, sifra. Arte ta toka hende, e ta laga bu sakudí i arte mester tin un lugá pa pueblo por laga su bos resoná.
Kòrsou ta riku na hopi artista, nos tin historia riku i nos mes no ta konsiente di dje. Ralph ta kere ku nos tin mas ku nos mes sa i e apresio pa arte ku no ta músika baliabel, tin bia públiko tin chèns di rechas’é òf bisa di no konos’é. Den esei por ta mas habrí.
Dia 16 lo ta kantu di playa. Lo tin stul pero tur hende por bin ku loke ta hasi nan mas kómodo., Lo tin wc, lo mira lus pa kondusí unda pa kana yega. For di mitar di 7 por bin i ta kuminsá 7 or te 9 or ku presentashonnan kontinuo.
I na final tur loke ku bin dilanti nan lo sigui traha ariba. Ralph Winedt a bisa ku nan ta planiando pa otro aña mas nochi di Open Mic. Ta nan deseo pa loke sosodé nan por sigui kanalisá den akshon. Arte no ta separá di loke ta pasa den sosiedat. Nan lo dokumentá i ta spera ku e lo yega na parlamentu i mandatarionan. Lo bai tin mas Open Mic i nan ta habrí pa sugerensia pa e obranan akí chispa kambio.
“Arte ta un vehíkulo pa protesta. Kargando Narativa komo plataforma literario i kolektivo di artista ta invitá un i tur pa bin kompartí un baile, poema, rèp, kantika, monólogo, kuenta, memoria pa huntu e ekspreshon bira un gritu di protesta kontra e bendementu di nos tera i limitashon na nos akseso”.
