Turistanan ayera mainta den e “favela” Morro Dois Irmaos, miéntras ku djis mas abou dje seru tabatin enfrentamentu entre polis i narkotrafikantenan.
RIO DE JANEIRO, Brasil (AFP).- Ayera mas ku 200 turista a keda atrapá te ariba den un seru famoso di Rio de Janeiro na momento di un operashon di polis kontra di narkotrafikantenan den un bario, e asina yamá “favela” di Rio de Janeiro. E operashon polisial den zùit di Rio tabata intensivo na momento ku a ataká gruponan di trafikashon di droga.
E bishitantenan durante di dos ora a keda den Morro Dois Irmaos, miéntras ku e tiramentu tabata tuma lugá riba miembronan di Comando Vermelho, un dje gruponan kriminal mas grandi di Brasil.
Morro Dois Irmaos, ku ta dominá e playanan di Ipanema i Leblo for di 533 meter di haltura, ta un dje miradornan mas famoso dje siudat i pa siman ta atraé míles di bishitante, ku ta subi e seru den oranan trempan di mainta pa mira salida di solo.
Na momento dje akshon polisial tabatin algu mas ku 200 persona presente, di kua 70% tabata turistanan strañero, segun Renan Monteiro, e operador di “Favela Turismo”. Monteiro a lamentá ku kada bes ku un operashon polisial tuma lugá den un favela “e notisia ta bai rònt mundu i esei tin impakto” riba e fluho di turista.
Segun Polis Sivil a bisa den un komunikado, ora ku nan a yega e trafikantenan a kuminsá tira i “konsientemente a pone na riesgo e habitantenan i e bishitantenan dje region.
“Nos tabata meimei dje tiroteo, e helikòpter polisial a pasa a riba nos kabes. Tabatin hende ku a kai flou, segun Debora Moraes, un turista ku a yega Rio prosedente di Sao Paulo. E turistanan a baha for di e seru despues di a haña lus bèrdè di polis.
Rio de 2025 a risibí mas ku 2.1 mion bishitante internashonal, ku ta un rèkert históriko.
E episodio di ayera a tuma lugá seis luna despues di un operashon polisial ku a kosta bida di por lo ménos 120 persona den vários favela den nort di Rio.
