Militarnan fuertemente armá ayera a drenta e siudat di Sinaloa persiguiendo trafikantenan di droga.
CIUDAD DE MÉXICO (AFP).- Diesun aparente kriminal a muri durante un operashon di Marina di México den e estado di Sinaloa, kuna dje kartel di e mesun nòmber i ku ta den un guera ku otro organisashon di narkotráfiko ku a laga desena di morto, segun gobièrnu mehikano a informá.
E akshon anti krímen di Marina a drenta vários kas kaminda tin relashon ku e organisashon di Ismael “El Mayo” Zambada, aktualmente prezu na Merka, segun sekretaria di Seguridat Públiko. E grupo kriminal ei ta den un disputa ku otro grupo ku tin na kabes e yunan di Joaquin”El Chapo” Guzman, tambe será na Merka.
E militarnan a keda risibí ku tirunan na momento ku nan a yega na e kasnan. “Komo resultado di esaki, di manera preliminar, 11 agresor ku tin relashon ku e mesun grupo kriminal a pèrdè nan bida”, segun outoridatnan. Mas aleu a duna di konosé ku den e mesun akshon a detené un integrante dje grupo di “Mayo” Zambada. E operashon a tuma lugá kasi un luna despues ku forsanan federal a mata Nemesio Oseguera “El Mencho”, lider di “Cártel Jalisco Nueva Generación” (CJNG), un dje organisashonnan kriminal mas grandi di México.
México a oumentá kantidat di detenshon i konfiskashon di droga, ku preshon di e gobièrnu di presidente merikano Donald Trump, pa para tráfiko di droga, partikularmente fentanilo.
