RIO DE JANEIRO, BRASIL, AFP.- Un operashon polisial djaweps a laga 13 morto den konfrontashonnan ku supuesto kriminalnan na un favela serka di Rio de Janeiro. Un lider di un gèng di narkotrafikante na nort di Brasil a keda detené, segun indikashon di outoridatnan.
“Tin 13 morto, dos individual detené i un gran kantidat di arma konfiská”, asina Fabricio Oliveira a informá den un rueda di prensa. E ta forma parti di e Kordinashon di Rekursonan Spesial di Polis Sivil di Rio de Janeiro.
E operashon a desaroyá den Kompleho di Salgueiro, ku ta keda na Sao Goncalo, un siudat den e periferia pober di Rio, ku kas un mion habitante.
“Tabata un operashon ku hopi violensia di nan parti”, asina Oliveira a bisa, refiriendo na esnan ku el a deskribí komo miembronan di un “gèng ku a usa táktikanan militar i di gueria”.
Meimei di e tiroteo intenso, dos muhé ku ta biba na e sitio a sali leshoná pero nan ta for di peliger, asina e bosero di polis a bisa.
