…Djis un parti dje armanan, droga i munishon ku a keda konfiská durante di un operashon polisial den e sektor Fazenda Coutos na Salvador, Brasil…
BRASILIA, Brasil (AFP).-Diesdos persona a muri den un bario dje siudat brasilero di Salvador den un operashon polisial riba e fecha di klousura di karnaval.
Forsanan di seguridat djamars atardi a yega na e sektor konosí komo Fazenda Coutos, kaminda dos grupo kriminal fuertemente armá tabata hibando un disputa kontra di otro.
E insidente a kulminá ku 12 kriminal kendenan a pèrdè nan bida. Segun e bosero polisial Werner, esnan ku a muri a sekuestrá un famia den nan kas, pa despues te hasta saka esakinan riba kaya pa tuma e kas komo nan propiedat. Tabata na e momento ei ku e tiroteo a kuminsá.
Na final, outoridatnan polisial a konfiská kantidat di mitrayur, pistol, revòlver i tambe droga, segun a bisa den un komunikado.
E insidente a tuma lugá pareu ku klousura di temporada di karnaval di Salvador, un di esnan mas bishitá di Brasil. E festividatnan a sigui normal den otro sektor dje siudat.
Operashonnan polisial kontra di krímen organisá ta algu frekuente den e barionan di Brasil, kaminda polis ta enfrentá trafikantenan di droga.
Den luna di yanüari último, e área metropolitiano di Salvador, un di esnan mas pober di Brasil, a registrá 43 morto den tiroteonan ku partisipashon di forsa polisial.
