LOS ANGELES, USA (AFP).- E strea di televishon norteamerikano Oprah Winfrey, a relatá kon e buki “The Color Purple” a yud’é pa pasa riba e trouma di violashon ku el a sufri na edat di 14 aña. El a hasi esaki durante di un presentashon di sine dje eksitoso obra.

E adaptashon nobo dje pelíkula musikal, ta e di dos vershon riba pantaya grandi dje buki di Alice Walker, despues dje pelíkula di 1985 dirigí pa Steven Spielberg, den kua e superstrea di televishon norteamerikano a hasi su debut sinematográfiko.

“The Color Purple” ta referí na e pruebanan, e sufrimentu i, mas ku tur kos, e agreshonnan seksual ku hopi muhé di koló a enfrentá na Merka den kuminsamentu di siglo XX.

“E buki ei a yuda mi for di e promé biaha ku m’a les’é, pasobra mi no tabata sa ku ta eksistí palabranan pa konta e loke a pasa ku ami”, segun Winfrey a bisa ayera.

“M’a keda violá na edat di 14 aña i m’a haña un yu, ku despues a muri, i mi no tabatin palabra pa splika esei”, segun Oprah Winfrey, konsiderá un dje muhénan mas eksitoso na mundu.

“The Color Purple” ta konta e historia di Celie, un hóben di koló den e zona rural dje estado di Georgia, ku ta keda violá pa su tata i obligá na bandoná su dos yunan.

Despues, Celie ta keda fòrsá pa kasa ku un hòmber abusivo, pero  ta haña e forsa nesesario huntu ku otro muhénan ku tambe tin nan troumanan.

Oprah Winfrey a relatá kon ora ku den dékada di 1970 el a tende ku Spielberg lo a dirigí adaptashon sinematográfiko dje buki, literalmente el a resa “tur anochi pa un oportunidat di por ta den e pelíkula”.

Su papel di Sofia a haña nominashon pa Oscar.

Spielberg i Oprah ta entre e produktornan dje pelíkula di Warner Bros ku lo estrená den sinenan di Merka riba dia di Pasku, i 24 di yanüari na Europa.

LAGA UN KOMENTARIO

Please enter your comment!
Please enter your name here