Blue Sky Care Curaçao a bin ku un proyekto dirigí pa yuda hende ku difikultat pa drenta laman fásilmente i alabes haña terapia. Alvaro Kalvenhoven a konta Djasabra ku The Blue Sky, ta manera e palabra ta bisa, esta Shelu blou i duna kuido. E nòmber ta reflehá ayudo, esta yuda otronan i den e kaso aki nos hende grandinan i hendenan desabilitá. Esei ta e meta di The Blue Sky Care Curaçao.
Kibra ku e tendensia
Awor aki tin oportunidat pa hende desabilitá por drenta laman. Na Kòrsou tin e tendensia ku ta kue un hende desabilitá, hink’é den huki i lubidá riba dje. Ku otro palabra mundu a kaba pe. Pero pa Blue Sky Care e hendenan aki tambe mester sosialisá i p’esei e oportunidat aki, via un stul flotante pa por drenta laman sano i salvo. Ta trata di un stul estilo di un boto “bootstoel” ku e hende ta sinta ariba pa por drenta laman.
Hidroterapista
Alvaro ta un hidroterapista i p’esei ta importante pa hende sa ku e ta duna guia huntu ku Nilo, pa trata e hende den laman. Dependé ki malesa òf kon e persona ta, nan ta trat’é. Ta dependé di e hende su situashon i su físika. No ta tur hende por trata di e mesun forma, pasobra kada un tin su nesesidat. I p’esei un hidroterapista tin di trata UN kliente alabes. Asina nan ta trata e hende den laman, pa asina tin mihó bista riba dje i konsentrá kiko e hende tin i atendé kuné.
Oportunidat pa tur por disfrutá
Blue Sky Care a nase na 2019 luna di novèmber i ofisialmente a habri na yanüari 2020. Nan a kuminsá ku un proyekto pa keiru ku grandinan. “Blue Sky Care ta pendiente di dos bus ku yudansa di gobièrnu pa sosialisá ku nos grandinan i ku kasnan di grandi”. Asina nan a kuminsá. Miéntras tantu Nilo a aserká Alvaro pa e boot-stoel. Nilo tabatin un i tabatin mester di piesa. Asina Alvaro i Nilo a sinta huntu i wak e oportunidat pa krese e posibilidat pa duna e hendenan desabilitá, hendenan ku a haña strook, esnan ku ke bai playa tin e oportunidat pa por disfrutá. Aktualmente nan tin un di e stulnan aki i ta pendiente pa mas yega,
Diferente ròl stul
Banda di esaki Blue Sky Care ta representante di ACCESREC di Merka. E kompania aki ta traha tur e tipo di ròlstulnan aki. Tantu e boto flotante, otro pa kore den santu i tin asta pa kore den mondi den kamindanan gròf. Ta tres di e tipo di ròlstulnan aki tin. Tambe tin tapeit spesial pa santu ku tambe lo yega Kòrsou tambe den futuro.
E tipo di ròlstulnan ku Blue Sky ke ofresé ta;
WaterWheels; Ta un ròlstul flotante ku ta permití personanan desabilitá akseso pa disfrutá di laman i pisina, danki na e mannan i e wilnan flotante, bo por us’é den awanan trankil.
TerraWheels ; Ta un ròlstul di laman diseñá pa personanan ku simplemente kier disfrutá di laman i naturalesa i tambe personanan ku tin problema ku kanamentu.
Hippocampe; Ta un ròlstul versatil i konfortabel, pa kore den lugánan gròf.
Pa loke ta e tapeitnan, Mat i Plastic Panel ku The Blue Sky Water Therapy ta ofresé:
- 1 – AccessMat: Tapeit speshal ku akseso pa yega laman
- 2 – AccessDeck: Panél speshal pa suela di plèstik premium
- 3 – AccessWood: Palu di rooster speshal pa laman
- 4 – GrassMat: Tapeit di yerba sólido
- 5 – WetMat: Tapeit speshal pa zona húmedo i muhá
- 6 – CocoBeach: Tapeit natural trahá di rama di koko
Laman pa tur problema, asta depreshon
Blue Sky a habri nèt den kuminsamentu di e pandemia. No nan so, pero ta henter mundu e pandemia a stroba. Pero tòg e hendenan ku desabilidat i hendenan malu kier a sosialisá den laman. Laman ta kibra tur malesa. E mihó kaminda pa bai rehabilitá ta laman. Tur hende por kòrda kon ántes ora ta ferkout, ta laman tin di bai pa saka e sleim ei. Laman ta bon pa muchu mas. Tin hende ta bai laman pa sirkulashon, hendenan ku pia gordo i ku no por kana, hendenan gordo mes, ta bai laman pa tambe lomba, doló di garganta. Tambe revalidashon i baha strès ta laman te kos. Tin hende den sirkunstansianan di depreshon i ta laman ta e kos. E komienso di e kompania tabata poko struf i e hendenan no tabata konosé e konsepto bon. Pero poko poko ku propaganda di boka pa boka e ta yegando. Pa nan di Blue Sky ta importante pa hende sa ku tin bia ta haña personanan ku mas di 20 aña sin por drenta laman i e servisio ei tambe tin, pa e hende ei tambe por disfrutá di nos dushi laman.
Aksesibel pa tur hende
Alvaro a konta nos di Djasabra ku Blue Sky Care a kuminsá komo un empresa propio. Alvaro huntu ku henter un tim a djòin un fundashon. Via di e fundashon aktualmente a hinka tur nan papelnan aden, dokumentonan a keda entregá na dos instansia di gobièrnu; e promé tabata na inspekshon pa por haña e Uniko Number pa asina por bin na remarke pa personanan por paga ku nan karchi dòkter SVB i e di dos ta ku nan a aserka SOAW pa haña supsidio pa mas material. Esei ta e proseso kanando awor aki i Alvaro ta keda optimista ku e lo logra pasobra si e logra ta pa pueblo e proyekto ta, Tin hopi hopi hende malu ku mester di yudansa pero pero no tin e moda pa por bai haña e servisio di Blue Sky. Alvaro a bisa ku ni e ni Nilo no tin sosten di gobièrnu i a tene nan preisnan pagabel pa e persona ku ke bai laman.
5 playa mas
Awor aki e servisio di Blue Sky ta na Pir di Marie Pompoen pero tantu Alvaro komo Nilo a bisa ku nan lo ke yega otro playanan. Nan ke yega 5 playa. Komo ku ta Nilo i Alvaro so, nan dos so no por kubri tur sinku playa. I esei lo krea e posibilidat pa mas hende haña trabou. Alvaro a pensa ku e ku Nilo por guia algun hóben ku den futuro, despues ku ekspandé por tuma over i bira terapista pa yuda e hende grandi. Nilo di su parti a bisa ku mester drecha playanan pa nan por bira aksesibel pa usa pa e stulnan flotante aki. Tin playa ku muchu baranka i otronan tin muchu ola. Mayoria hende grandi no por landa i otronan tin miedu di awa. I p’esei nan a pone atenshon na e siguiente playanan; Marie Pompoen, Piscadera, Lagun, Boka i Caracasbaai.
Kontakto
Nilo tei mayoria bia, kasi tur dia na Mari Pampun, Nan ta traha ku sita i ta konsehabel pa yama i reservá pasobra kada persona ta tuma su tempu. Tin hende ta bai mei ora i por bai máksimo un ora. Por yama 5405818 òf 5104677.
