Konsulado general di Merka na Kòrsou ta lansa proseso di solisitut pa e programa di beka YLAI (Young Leaders òf the Americas Inisiative Fellowship 2021), ku ta un programa di 6 siman pa empresarionan finansiá pa ofisina di asuntunan edukativo i kultural di departamento di estado Merikano. Sady Elhage di Konsulado merikano a duna un splikashon di e programa miéntras ku Sulin Passial Alumni di e programa aki na 2016 a splika kiko el a eksperensia.

Grátis…

Segun Sady Elhage, Young Leaders òf the Americas Inisiative ta kai bou di departamento di estado e büró di edukashon i kultura. E programa aki ta spònser un hóben entre 25 p 35 aña pa bai Merka 6 siman i sigui kurso kon pa ekspandé su negoshi. E ta haña guia kon pa enfrentá retonan mihó, e ta sera kontaktonan nobo i esaki kompletamente grátis. Partisipashon i inskripshon ta grátis.

 

6 siman na Merka…

E programa aki no ta nobo. E ta eksistí for di 2015 i ya kaba tin 16 persona ku a partisipá den e programa aki di Kòrsou, Aruba i St. Maarten. Na e momentu aki tin 4 persona mas den e programa pa 2020 pero pa motibunan di COVID no por a bai i a bai virtual. E partisipante ta haña ticket, estadia i tur kos. E 6 siman ta partí. E promé siman ta drenta un apertura di orientashon na Arizona pa konosé e grupo kompleto. Aki ta trata di mas òf ménos 250 persona. Di einan pa 4 siman ta keda partí den gruponan di máksimo 20 persona, mayoria grupo di 6 pa 7 hende i na kabes un coach ku lo duna guia riba kompania i e partisipante por traha serka e coach aki pa interkambiá di idea i forma eksperensia. E último siman tur hende ta bai bèk Washington pa sera e programa.

Balor grandi…

E balor di e proyekto aki pa Kòrsou ta grandi. Pa haña oportunidat di bai Merka kompletamente grátis, risibí guia riba negoshi i bin bèk i ehekut’é den bo mes pais ta un oportunidat úniko. Sady ta konsehá tur hende ku tin negoshi i ta deseá di krese pa tuma parti. E úniko sakrifisio ku e partisipante tin di hasi ta kita 6 siman for di su negoshi. Pero loke ta trese bèk den pais ta algu inkreibel Sady a splika.

 

Kondishon…

E partisipashon tin algun kondishon mará na dje. Dado kaso e partisipante a yega Merka, el a gusta i tin gana di keda i hasi negoshi einan, esei no ta posibel. Segun Sady pa e programa aki bo tin di bini na remarke pa un J-Visa i esei ta duna e pèrmit pa keda e 6 siman pero e tin kondishonnan mará na dje. Un di e kondishonnan ta ku pa 2 aña despues di e programa e partisipante no por traha na Merka pero e tin di bai bèk su pais i invertí e eksperensia ku a haña na Merka us’é den bo pais.


Intensivo…

E inskripshon awor a habri i ta sera 25 di febrüari. Mester apliká online. E ta un proseso intensivo pasobra tin basta pregunta. Pero esaki ta pa sa ken e persona ta i su metanan. Despues e persona ta kai den selekshon i ta bai den un entrevista i esun ku gana ta bai partisipá. For di e grupo ta skohe dos di Kòrsou, un di Aruba i un di St. Maarten. E persona mester ta biba na Kòrsou Aruba òf St. Maarten. E nashonalidat no ta importá pero e mester por bin bèk pa invertí den e pais for di unda el a sali.

 

Alumni…

Sulin Passial a partisipá na e programa aki na 2016. E tabata e promé grupo di Kòrsou ku a bai e programa di YLAI. Segun Sulin, e programa aki tabatin balor agregá grandi pe. El a amplia su netwerk ku hendenan di Karibe i Latino Amérika. Nan grupo di e tempu ei ainda ta komuniká ku otro i loke nan mester, nan sa ku nan tin otro pa duna sosten. Tambe el a habri su wowo i siñ’é e negoshi di su business. E ta traha media, pelíkula i e tipo di kontenidonan pero e parti di mas negoshi i krea produktonan nobo den su sektor tabata algu ku Sulin a siña den e proseso di su partisipashon.


Diversifiká…

Durante di e 6 siman ku Sulin tabata na Merka e kos ku mas e ta kòrda ku a resaltá tabata e eksperensia na Texas. Ora el a tende ku ta Texas e ta bai, e tabatin miedu pasobra tabata den e temporada di algun kos fèrfelu na Texas i e ta koló skur. Pero Sulin a bisa ku e estado ei a sorprendé gratamente. E siudat a keda den su kurason komo un siudat masha great mes. E ta pidi tur ku apliká ta habrí pa haña e loke e siudat tin pa brinda den bo. Sulin a diversifiká for di momentu ku el a sali e partisipashon na Merka, den vários aspekto ku el a habri su wowo pa pensa den e direkshon ei.  El a diversifiká su negoshi den último añanan danki na e partisipashon ei. Sulin a bisa tambe ku hasimentu di negoshi último añanan ta un reto. Si bo ke e ta duna e espasio pa krea, moldia i krese. Tur kos ta dependé kon e persona ta para den e proseso.

Intensivo…

Durante di e 6 siman ta tur dia tin algu. Djis imaginá ku komo partisipante bo ta bai keda di Coach pa un empresa ku ta manera bo mes empresa. Mester traha tur dia na e empresa i anochi tin eventonan di netwerk i djabièrnè tin un dia di kurso i den wikènt tin aktividatnan. Ta henter siman durante di 6 siman ta bezig konstante. No kere ku ta bai Chill òf kere ku por sigui drai bo empresa na Kòrsou miéntras bo ta partisipando den e programa na YLAI, mester skohe konsiente pa blòk e 6 siman. I e ta para hopi lihé segun Sulin.

Mas envolví…

Konsulado merikano na Kòrsou no ta un lugá manera hopi ta kere ku ta sòru pa duna Visa merikano so, Sady a splika nos ku nan tin diferente otro programa ta ofresé. Nan ta purba di ta mas envolví posibel den komunidat i no solamente ofresé un Visa pa bai fakansi afó pero pa konosé mas di unda bo ta bida. E konsulado merikano ta situá aki na Kòrsou pero nan no tei solamente pa Kòrsou pero tambe pa otro islanan di eks Antia.

 

Ora e grupo bai i bin bèk, nan ta sigui den kontakto ku nan. Sady a bisa ku nan ta organisá eventonan huntu, oportunidatnan ta sigui krese via di nan di konsulado mes pero tambe tin e YLAi network ku ta duna mas oportunidat i mas kurso, konekshonnan pa traha ariba. E ta un proseso kontinuo. Despues di YLAI su partisipashon e oportunidatnan pa krese no ta kaba pero ta sigui.

E temanan ta varia i nan no ta skohe a base di tema. Kualke empresario ku ta kualifiká pa partisipá por hasié. Ta konta pa personanan ku ta ofresé servisio pero tambe produktonan.

E eksigensianan segun Sady ta ku e persona mester ta biba riba un di e islanan aki, e mester ta entre 25 pa 35 aña, e negoshi mester ta eksistí pa sigur 2 aña i mester por proba ku den 2 aña bo a krese, bo ta funshoná i ke sigui krese. E partisipante mester ta inskribí na Kámara di Komersio. E persona ku ke partisipá por ta di un NV, BV, Eenmanszaak etc.

 

Partisipá, e ta importante…

Sady a bisa ku e reakshon ku nan ta hañando awor aki no ta sufisiente i p’esei hende tin di komprondé kon importante e programa aki ta. Sady a pidi personanan ku ta pensa e kos aki ta interesante pa tuma e chèns. Si no kualifiká mes e aña aki, tin otro aña tambe ku por partisipá na dje. E programa ta kompletamente na ingles.

E proseso di solisitut a habri i ta keda habrí te 25 di febrüari. E fecha nan tentativo ta 11 di òktober pa novèmber i e partisipantenan por hasi nan solisitut via https://ylai.state.gov  The YLAI Professional Fellows Program. E partisipante lo haña un visa pa Merka e asina yama J-1. Ta importante tambe pa nan ta registrá na Kámara di komersio i tambe no mester ta un siudadano merikano ni ta biba na Merka.

Konsulado merikano na Kòrsou lo organisá un seshon di informashon virtual dia 17 di febrüari di 2 pa 4 or di atardi. Mester registrá via  [email protected] 

 

 

LAGA UN KOMENTARIO

Please enter your comment!
Please enter your name here