CARACAS, AP.- Kayanan bashí, sentenar di negoshi será  i algun ruta blòkiá ku barikada, palu i shushi por a wòrdu opservá desde djaweps mainta na Caracas komo parti di un wèlga ku a start 6or di mainta i ta ekstendé te djabièrnè.

Ministerio Públiko a reportá fayesementu di Ronney Eloy Tejera di 24 aña durante un insidente ku arma di kandela durante protesta den un munisipio den estado sentral di Miranda. Ademas, a konfirmá morto di Andres Uzcategui di 23 aña durante un protesta den un  bario pober den estado di Caracobo.

Ku e paro síviko nashonal, oposishon ta preshoná gobièrnu di presidente Nicolas Maduro un biaha mas i su inisiativa pa bolbe skibi konstitushon di Venezuela.

Den algun siudat den e pais a registrá un paralisashon di aktividatnan, segun reportahe di medionan lokal.

E ousensia di transporte públiko, ku tambe a djòin e parti, a obligá desena di persona pa kana vários kilometer pa yega agensianan di banko, botika i asta hospital, ku a logra habri ku masha tiki personal.

“Mi mester a lanta mardugá i kana tres ora pa yega mi trabou paso no tin transporte”, asina Frangeli Fernandez di 24 aña a relatá. E ta akountent na banko i mester a sinta pafó pa warda esaki habri mainta.

“Un kambio di gobièrnu ta urgente paso loke nos ta biba aden ta patétiko. Nos no ta haña kuminda ni nada i e tiki ku tin ta muchu karu”, asina Fernandez a bisa rekonosiendo ku ounke e no tabata masha di akuerdo ku e protesta e tabata sostené pa hasi algu “radikal pa kaba ku e kos aki mas pronto ku ta posibel”.

Algun sindikato nashonal di trahadó i transporte a anunsiá nan respaldo na e inisiativa di koalishon opositor miéntras dirigentenan di ofisialismo a deskartá ku empleadonan di sektor públiko a uni na e paro.

Despues di e plebisito realisá dia 16 di yüli den e pais, 7,5 mion venezolano a  rechasá e proseso konstituyente. Mesa Unidat Demokrátiko, integrá pa mas di binti partido, a disidí pa eskala protesta dor di anunsiá un paro síviko nashonal di 24 ora.

LAGA UN KOMENTARIO

Please enter your comment!
Please enter your name here