CARACAS.- No ta solamente oposishon den e pais mes, sino hopi pais ta poniendo preshon riba Nicolás Maduro pa ser transparente i proba loke e ta pretendé ku e resultadonan dje último elekshonnan. Hopi pais Latino-Amerikano, Merka, den Europa etc. a duna di konosé kaba ku nan lo no rekonosé e resultado i tampoko Maduro si e insistí pa keda riba e stul di presidente.
Di otro banda, despues di a pasa un periodo skondí, e lider di oposishon venezolano, Maria Corina Machado a partisipá djasabra último den e akshonnan di protesta unda míles di venezolano a yega pa demostrá nan malkontentu. El a duna di konosé ku awor venezolanonan ta mas uní i determiná ku nunka. Nan ke nan libertat, libertat pa e pais ku pa hopi aña kaba ta ser empobresé dor di Maduro i su Chavismo.
Pero Maduro ta dunando resistensia, bisando ku e lo no akseptá ku Machado ta desbalansá e pais dje forma aki, i asta a menasá di detené.
