Èks prezu polítiko, Angela Vasquez (meimei), ta reuní ku famianan pafó dje prizòn El Rodeo den Guatira, Estado de Miranda, despues ku el a sali for di prizòn.
CARACAS.- Ayera Dinorah Figuera, hefe di delegashon opositor na e mesa di diálogo ku gobièrnu interino di Venezuela, a eksigí e liberashon di tur prezu polítiko, despues dje anunsio ku nuebe di nan por a bandoná prizòn ayera.
Rodriguez, ku ta goberná bou di preshon fuerte di Merka, den luna di yanüari despues di kaptura di Nicolas Maduro, a bin ku un lei di amnistia, pero e proseso di liberashon ta kana poko-poko.
“Ta un eksigensia nashonal fundamental pa tur prezu polítiko keda liberá”, segun el a bisa den un mensahe riba X. “Den un pais ku ta avansá pa e transishon demokrátiko, no por tin prezunan polítiko”, segun el a asentuá.
Te ku ayera e organisashon di derechinan humano, Foro Penal, a logra verifiká salida for di prizòn di 78 prezu polítiko, un sifra mas abou kompará ku loke gobièrnu a anunsiá djabièrnè último.
“Ta importante pa aklará e sifranan ofisial, ya ku nan ta otro kompará ku loke organisashonnan di derechinan humano a verifiká”, segun Figuera.
E proseso ei ta kana pareu ku e negosiashonnan entre un sektor di oposishon i representantenan di gobièrnu, ouspisiá pa e gobièrnu di Merka ku ta referí na un periodo di transishon, siguí pa elekshon.
Den e promé parti di diálogo liderá pa Figuera i pa e presidente di parlamento, Jorge Rodriguez, a akordá un reforma total dje sistema di hustisia i rekuperashon di fondonan venezolano den eksterior.
E hefe di diplomasia di Merka, Marco Rubio, resientemente a bisa ku e liberashon di prezunan “ta un paso krusial pa e proseso di rekonsiliashon dje nashon”.
Rubio a duna di konosé ku for di despues dje amnistia un total di 1.064 detenido, pa rasonnan polítiko, a sali for di prizònnan. E sifra a keda konfirmá pa e presidente venezolano.
