NICOLAS MADURO; A kumpli 90 dia ku e no ta na poder.
CARACAS (AFP).- Oposishon di Venezuela a pidi ayera pa konvoká elekshon presidensial konsiderando e “ousensia apsoluto” di e mandatario Nicolás Maduro, despues ku a kumpli 90 dia manera Konstitushon ta establesé den tipo di situashon asina’kí. Delcy Rodriguez, kende tabata e vise presidente di Maduro, a keda huramentá komo presidente dia 5 di yanüari, dos dia despues di kaptura di Maduro di parti di forsanan norteamerikano.
Maduro ta keda prosesá na New York pa narkotráfiko. “A transkurí for di e fecha di bahamentu di Maduro mas ku e 90 dianan ku ta keda establesé pa artíkulo 234 di konstitushon pa Asamblea Nashonal konsiderá e loke henter e pais i komunidat internashonal demokrátiko sa i ta konstatá: e eksistensia di un ousensia apsoluto den Presidensia dje Repúblika”, segun e partido “Vente” di e lider opositor i Nobel di Pas Maria Corina Machado.
“Mester konvoká elekshon presidensial den e siguiente 30 dianan segun konstitushon”, e komunikado ta bisa mas aleu. Konstitushon di Venezuela ta establesé ku “e ousensia temporal di presidente dje Repúblika lo keda okupá pa e vise presidente ehekutivo te ku nobenta dia, ku posibilidat pa prolongá esaki ku ooro nobena dia”.
Rodriguez, kende ta goberná bou di preshon di Merka di kua su gobièrnu ta bisa di ta kontrolá e negoshi petrolero di Venezuela for di despues di kaptura di Maduro, tampoko a papia públikamente na fabor pa konvoká elekshon nobo.
Sinembargo, organisashonnan polítiko ta reklamá pa yama elekshon pa presidensia i e kambio di outoridatnan den Konseho Nashonal Elektoral.
