CARACAS (AFP).- E èks-kandidato presidensial, Henrique Capriles, a defendé su postulashon komo diputado di Parlamento di Venezuela i a pidi pa vota den elekshonnan di 25 di mei, apesar di un yamada di bòikòt di parti dje prinsipal koalishon di oposishon.
E èks-rival di defuntu presidente Hugo Chavez den 2012, i dje aktual presidente Nicolas Maduro den 2013, Capriles a keda ekspulsá medio aprel for dje partido Primero Justicia, di kua e tabata un dje fundadónan, despues ku el a postulá pa elekshon parlamentario i regional.
“Mi ta bai Asamblea Nashonal pa mi ta e bos di esnan ku no tin bos. Pa defendé trahadónan, pa defendé penshonadonan, pa defendé ekonomia. “Mi ta kontra di e gobièrnu akí, pero tambe ta kontra di kosnan ku ta afektá e venezolano”, segun el a bisa.
E lider opositor, Maria Corina Machado, huntu ku e aliansa di partidonan Plataforma Unitaria, ku a forma parti di Primero Justicia, a hasi un yamada pa bòikotiá elekshon despues di a denunsiá un froude den e re-elekshon di presidente Nicolas Maduro den yüli pasá.
Capriles a alehá su mes dje yamada dje bloke konformá pa dies partido di oposishon i, di su parti, a hasi un yamada pa bai vota. Esaki a generá un ola di krítika di parti di oposishon.
Mester vota komo akto di resistensia, di lucha”, segun e opositor. “Nos sa ku e voto na Venezuela no ta pa eligí, pero e ta un instrumento pa laga nan sinti e sentimentu di kambio”, el a agregá.
Capriles (52), a yega di ta e diputado mas hóben di Venezuela, na edat di 25 aña.
