MADRID, SPAÑA.- E opositor venezolano Edmundo González Urrutia, rival di Nicolás Maduro den elekshonnan di 28 di yüli, a bisa di lo sigui lucha pa libertat di Venezuela for di eksilio despues di a yega Spaña ayera, kaminda lo e haña asilo polítiko.
“Mi tin konfiansa ku próksimamente nos lo sigui lucha pa logra libertat i rekuperashon di demokrasia den Venezuela”, segun e diplomátiko di 75 aña.
E avion di Forsanan Aéreo spañó ku a trasladá Gonzalez i su kasá a baha na a base Torrejón de Ardoz, serka di Madrid, 4 or di atardi.
“For di awor, nos lo kuminsá e trámitenan pa petishon di asilo, di kua e resolushon lo ta na fabor pa loke ta kompromiso di Spaña ku derechinan polítiko i integridat físiko di tur venezolano, spesialmente e lidernan polítiko”, segun Gonzalez e ta bisa den un nota.
E lider opositor Maria Corina Machado a duna di konosé ku e salida for di Venezuela dje kandidato, di forma klandestino, tabata nesesario pa “preservá su libertat i su bida” meimei di “un ola brutal di represhon”.
E hefe di diplomasia spañó, José Manuel Albares, di su parti a bisa ku “no tabatin ningun tipo di negoshashon polítiko entre gobièrnu di Spaña i gobièrnu di Venezuela. “Spaña nunka lo bira lomba i tampoko lo bandoná, ni Edmundo Gonzalez ni ningun venezolano”, segun el a deklará den un deklarashon na televishon.
“Awe ta un dia tristu pa demokrasia na Venezuela”, segun e hefe di diplomasia di Union Europeo, Josep Borrell, den un komunikado den kua e ta asentuá ku “den demokrasia, ningun lider polítiko mester sinti su mes fòrsá pa buska asilo den otro pais”.
