CARACAS (AFP).- E lider di oposishon venezolano i premio Nobel di Pas, Maria Corina Machado, a akusá e gobièrnu di su pais di ta stroba su regreso na Venezuela, ku ta gòlpiá pa dos temblor potente ku a mata mas ku 1.700 persona.
Machado for di desèmber ta den eksilio, despues di a protagonisá un huida espektakular dje pais pa por a bai risibí e premio Nobel di Pas na Oslo. Den un video riba su página X for di Panamá, e opositor a bisa ku e gobièrnu di Delcy Rodriguez ta strob’é pa regresá pa kompañá venezolanonan “den e oranan difísil akí”.
Segun Machado, e gobièrnu “a sera aéreo espasial komersial di Venezuela pa stroba” su entrada. Despues “nan mester a habrié bèk, pero nan a menasá esnan ku lo a fasilitá mi regreso”, segun el a agregá.
E aeropuerto internashonal di Maiquetia na Caracas a keda será debí na dañonan kousá pa e temblornan. Pero, a habrié bèk parsialmente pa risibí buelonan humanitario, miéntras ku e aeropuertonan di Valencia i Maracaibo sí ta habrí pa buelonan komersial internashonal.
E temblornan a surgi kasi seis luna despues ku Nicolas Maduro a keda kapturá den un operashon militar di Merka. Su visepresidente, Delcy Rodriguez, a sinta komo presidente interino i e gobièrnu ta bou di preshon di Washington.
