CARACAS, AP.- Opositornan a yama ayera pa protestá na Caracas na seramentu di e bishita di e komishonado haltu di Nashonnan Uní Michelle Bachelet ku a generá gran ekspektativa pa ku e instalashon di Venezuela den un ofisina di organismo pa monitoreá e situashon di derechinan humano.
Bachelet a kuminsá un gira den su bishita ku un enkuentro ku lider opositor i hefe di e Asamblea Nashonal Juan Guiadó i miembronan di legislativo.
Na final di e reunion Guaidó a bisa na prensa ku e eks presidente chileno a anunsiá ku ta establesé den e pais un ofisina temporal pa hasi un análisis di e situashon di e derechinan humano i ku su funshonarionan por bishitá algun di e estadonan mas paden di e pais.
E dirigente ku a keda rekonosé komo presidente interino di Venezuela pa medio di un kantidat di pais, a afirmá ku e bishita di e komishonado haltu ta fundamental pa laga sa di e dimenshon di e situashon di Venezuela kual e ta sigurá ku ta kasi un katástrofe.
“Nos reto ta pa sigui ta den kayanan”, asina Guaidó a bisa ora el a remarká ku oposishon lo sigui ta den protesta pa preshoná e salida di gobièrnu di Nicolás Maduro.
Bachelet ta terminá su gira di trabou ku un enkuentro ku Maduro den palasio di gobièrnu. E komishonado haltu lo presentá anochi poko promé ku e sali di e pais un balanse di su tres dianan di bishita ku a inkluí reunionnan ku outoridatnan miembronan di organisashonnan humanitario i víktimanan di violashon di derechinan humano i nan famianan.
Promé ku esaki e organisashonnan humanitario a dialogá ku Bachelet riba kasonan ku nan a yama prezunan polítiko. E prezunan aki, ku nan ta kalkulá ta 693 a bira den último añanan den un bandera di aktivistanan i oposishon ta akusá gobièrnu di Maduro di violashon di derechinan humano. Pero outoridatnan ta bisa ku nan a bai prezu pa delitonan komun i no pa motibunan polítiko.
