MIAMI, AP.- Organisashon Panamerikano di Salú (OPS) a bisa djamars ku ounke e pandemia di coronavírus a oumentá den Latinoamérika, ainda tin tempu pa redusí esaki su impakto.
E direktor di OPS, Carissa Etienne, a bisa ku e region a drenta den un fase nobo kaminda mayoria pais ta reportando kasonan lokal. El a sigui bisa ku e pandemia lo empeorá den e kontinente amerikano promé ku kos mehora, “meskos ku a pasa na tur sobra parti di mundu”. E eksperto a papia den un konferensia na telefòn desde e sede di organisashon na Washington.
Aktualmente, e region a enfrentá un oumento den e kantidat di pashèntnan infektá i e kantidat di morto, ounke e sifranan ta hopi mas abou kompará ku Italia, Spaña i Merka.
Latinoamérika tin por lo ménos 14.000 infektá i 300 morto pa e coronavírus. Etienne a bisa ku e kontinente kompleto a registrá mas di 163.000 kaso konfirmá i 2.836 morto. Mas o ménos 174.000 persona a rekuperá na vários pais rònt mundu.
