Riba puntonan pendiente
WILLEMSTAD.- E organisashonnan ku ta representá penshonadonan di gobièrnu lo manda un karta pa gabinete Pisas III pronto pa wak ki dia ta bai reuní atrobe pa atendé puntonan ku ta pendiente. Ta trata di kambio di e lei di penshun pa lòs indeksashon di salario di ámtenar for di indeksashon di penshun di ámtenar i tambe aspektonan relashoná ku “duurtetoeslag” ku penshonadonan ta kobra riba nan penshun.
Presidente di UPAH, Oswin Martina, a bisa den e podcast ‘3or ku Gino’ riba plataforma digital di EXTRA ku pronto tur organisashon ku ta representá penshonadonan lo sinta huntu pa traha un karta pa gobièrnu ku e meta pa kontinuá ku e reunionnan. E organisashonnan di penshonadonan for di algun aña kaba a kuminsá lòbi serka gabinete Pisas II pa haña wak kon por atendé diferente punto na bienestar di e penshonado. E último reunion a tuma lugá promé ku elekshon.
E reunion tabata ku minister di Finansa, Javier Silvania. Den Konseho di Minister a disidí pa laga minister di Fiansa atendé ku e kambio di lei di penshun. UPAH huntu ku e otro organisashonnan di penshonado a traha riba un proposishon pa kambia e lei.
A reuní ku fondo di penshun, APC, riba e kambio di lei i APC a keda di wak e kambionan proponé. Te ainda e organisashonnan ta den kontakto ku APC i por a komprendé ku e proposishon mester a bai e plataforma di konsulta entre gobièrnu i sindikatonan, GOA. A disidí di warda pa ora e minister nobo di Maneho di Gobernashon, Planifikashon i Servisio Públiko sinta pa sigui atendé ku e proposishon di lei.
Martina ta bisa ku e kambio di lei akí ta na benefisio di e empleado públiko tambe pasobra un dia e tambe ta bira penshonado. Otro punto ku e penshonadonan tin pendiente pa atendé ta e “duurtetoeslag”. “Duurtetoeslag” ta un kompensashon adishonal di gobièrnu na penshonadonan pa kubri kosto di bida i asina e penshonado haña realmente 70 porshento di salario.
Martina ta bisa ku e problema mas grandi ta ku ora ku gobièrnu indeksá e “duurtetoeslag” penshonadonan di algun kompania di gobièrnu no ta haña e indeksashon akí. Tabatin reunion ku promé minister Gilmar ‘Pik’ Pisas riba e punto akí. A invitá tur e kompanianan di gobièrnu pa e reunion pa indiká si ta paga e indeksashon di “duurtetoeslag” òf dikon no ta paga esaki.
“Promé minister a duna e kompanianan hùiswèrk pa asina bin ku splikashon kiko si i kiko no por paga.” Mester a bini bèk den un di dos reunion pero esaki nunka a tuma lugá, Martina ta sigui bisa. E punto akí tambe a bai kai bou di minister di Finansa i e minister a duna su kolaboradónan instrukshon pa chèk ku e kompanianan.
Penshonadonan ta pendiente pa pone un reunion pa kaba di atendé e punto aki. Pa loke ta e 10 porshento ku segun pakete di pais mester kòrta den e “duurtetoeslag”, Martina ta bisa ku tur biaha ku a papia ku gobièrnu a bisa ku lo no aseptá esaki. Pero, ainda no a logra ku a saka e intenshon pa kòrta ku 10 porshento den e “duurtetoeslag” for di e pakete di pais i e ta un motibu di preokupashon pa penshonadonan ku ya kaba ta kobra un penshun ku ta solamente 70 porshento di nan salario.
Foto:
…Oswin Martina…
