Kòrsou, Aruba i islanan BES
WILLEMSTAD.- Organisashonnan di penshonado di Kòrsou UPAH, Aruba, Organisashon di Penshonado Públiko di Aruba (OPPA) i Islanan BES (Boneiru, Saba i St. Eustatius), Fundashon Union di Penshonado Hulanda Karibense (UPHK), ku tin su sede na Boneiru, ta bai uni forsa i mantené lasonan mas estrecho di kooperashon ku otro. Presidentenan di e organisashonnan di penshonado di Aruba i Boneiru ta na Kòrsou i a hiba deliberashon djaluna último ku UPAH.
Asina presidente di UPAH, Oswin Martina, ta konfirmá pa EXTRA. E intenshon ta ku kolaborando huntu e organisashonnan ta yuda otro. Martina ta mustra ku spesialmente penshonadonan ku a traha den polis, duana i telekomunikashon a traha riba kasi tur isla di èks Antianan Hulandes. Nan ta kompartí e mesun kultura i por bini ku ideanan pa por yuda otro.
Un ehèmpel di e ayudo ku por duna otro, ku Martina ta para ketu na dje, ta loke a tuma lugá 3 aña pasá. Riba invitashon di e organisashon di Aruba, OPPA, el a asistí na 35 aña di eksistensia di e organisashon. Durante di e bishita akí a deliberá riba kiko ta organisá na Kòrsou pa penshonadonan.
Martina ta bisa ku el a informá ku na Kòrsou ta selebrá tur aña ofisialmente Dia di Penshonado. Na Aruba i Boneiru, a base di esaki, OPPA i UPHK a tuma kontakto ku nan respektivo gobièrnunan ku a disidí di adoptá loke ta hasiendo na Kòrsou. “Asina a bira ku riba e otro islanan tambe ta selebrá Dia di Penshonado, igual ku na Kòrsou.”
A base di e protokòl di koperashon ta pensa di stipulá ku kada 2 aña ta organisá e selebrashon di Dia di Penshonado riba un isla. Segun Martina e idea di hasié kada 2 aña ta pa penshonadonan tin sufisiente tempu pa spar un sèn i hasi e biahe pa un otro isla den kuadro di e selebrashonnan.
Martina ta spera ku den futuro St. Maarten tambe por djòin. E ta splika ku tin un organisashon di penshonado aktivo riba e islanan pero ku e organisashon akí ta di eks ámtenarnan ku a traha den hustisia. Ta hasiendo trámitenan pa amplia e miembresia ku penshonadonan ku a traha pa otro servisionan tambe.
Ora t’asina leu e organisashon akí tambe lo por djòin ku esnan di Kòrsou, Aruba i Boneiru den e kolaborashon. Durante e reunion di ayera na Kòrsou a deliberá riba un kombenio ku pa formalisá e kooperashon entre UPAH, OPPA i UPHK. E organisashonnan lo bai bèk den nan seno pa planta e idea i haña aprobashon di miembronan.
Martina ta splika mas aleu ku ta despues di a aprobashon akí lo plania un fecha pa asina firma e kombenio di kolaborashon.
Foto:
D.r.p.d. Presidente di UPAH, Oswin Martina, presidente di UPHK, Pancracio ‘Pancho’ Cicilia, i Ivo Valdez presidente di OPPA.
