CANCUN.- Orkan Beryl a asotá e península di Yucatan na Mexico ayera ku bientunan fuerte ku a okashoná hopi daño, pero afortunadamente nada di daño personal. E tormenta a pasa riba e pais aki den oranan tempran di mainta ku bientunan di 175 km/ora, tumbando palunan i tambe palunan di lus, ranka dak i kousa inundashon, esei di akuerdo ku fuentenan ofisial. Pa un periodo largu koriente a kai afó den por lo ménos tres munisipal den e parti sùit di Quintana Roo. I ku bientunan di 140 km/ora Beryl a sigui penetrá den e pais.
Den e reportahenan inisial no ta parse di tabatin ningun pèrdida di bida, i esei ta loke ta konta mas tantu, di akuerdo ku Presidente Andres Maule Lopez Obrador. E gobernador di Quintana Roo, Mara Lezama, tabata proaktivo i a urgi tur siudadano pa nan keda den kas, miéntras ku a suspendé skol pa e dia. Un kantidat di 2.200 hende mester a ser evakuá i pone den shelternan temporal.
