STEINHATCHEE, USA (AFP).- Orkan Helene a laga por lo ménos 33 morto i a provoká hopi inundashon den área zùitost di Merka, lagando miónes di hende sin elektrisidat. Por lo ménos 14 persona a muri den South Carolina, diesun den Georgia, shete den Florida i unu na North Carolina, segun un balans di outoridatnan lokal.
Kamindanan, kas- i negoshinan a keda bou di awa despues ku Helene a yega tera serka di Tallahassee, kapital dje estado di Florida, den oranan di djaweps anochi i a avansá pa nort, ounke el a debilitá i bira tormenta tropikal.
Sentro Nashonal di Orkan a informá di ”inundashonnan históriko i katastrófiko” i a atvertí pa laman haltu ku por subi tera na Atlanta, e siudat mas grandi di Georgia, komo tambe den South i North Carolina.
Na Peryr, un siudat serka dje sitio kaminda Helene a suta kosta komo un potente orkan kategoria 4, kasnan a keda sin elektrisidat i e stashon di gasolin a keda destruí.
“Mi ta di Florida, pues m’a kustumá un poko, pero esaki si na dado momento a duna mi hopi miedu. Ta komo si fuera mi kas lo a bula”, segun Larry Bailey (32) kende a pasa anochi skondí den un kas chikitu huntu ku su dos subrinonan i ruman muhé.
Aeropuertonan di Tampa i Tallahassee a sera i mas di 3.4 mion kas i empresa a keda sin koriente den Florida, Georgia i e estadonan Caroline.
