SIUDAT DI MEXICO, AP.- Orkan Willa a mantené komo un tormenta potensialmente katastrófiko ounke esaki a debilitá i baha na kategoria 4. Djaluna atardi, esaki a kontinuá riba su ruta rumbo pa kosta mehikano den oséano pasífiko ku bientu di 250 kilometer pa ora. Outoridat a emití òrdu di evakuashon di algun zona na kosta.
Un total di 19 munisipio a wòrdu deklará den situashon di “emergensia ekstraordinario”, 12 den estado di Nayarit i 7 na Sinaloa, segun informashon di Sekretaria di Gobernashon.
E tormento ta representá un menasa pa vários hotèl, playa i pueblo di peska. Algun hotèl ya a kuminsá prepará i purba kita tur material los den zonanan mas vulnerabel.
Yamile Bustamante, asistente di gerensia di Crown Plaza di Mazatlan, Sinaloa, no a deskartá ku lo kuminsá evakuá wéspetnan den oranan lat di djaluna, ounke e hotèl tabata wardando riba instrukshon di outoridat.
Ounke e forsa di e orkan su bientu a debilitá, Sentro Nashonal di Orkan di Merka a atvertí ku su impakto ta keda “ekstremadamente peligroso”. Posiblemente e orkan ta sigui debilitá awe tambe.
E bientu di e orkan tabata ekstendé 55 kilometer di su wowo i e tormento tropikal aki ta 205 kilometer largu
