SAN JOSE, COSTA RICA (AFP).- Kongreso di Nicaragua a aprobá un reforma konstitushonal ku ta duna e presidente Daniel Ortega i su kasá Rosario Mutillo, komo “ko- presidente”, un kontròl apsoluto di poder dje Estado.
Asamblea Nashonal, kontrolá pa Frente Sandinista de Liberación Nacional (FSLN, iskierda), a aprobá “di forma unánime” e inisiativa presentá djamars pa e mandatario, segun a keda anunsiá pa e hefe parlamentario Gustavo Porrras promé ku e plenario.
E reforma ta amplia e mandato presidensial di sinku pa seis aña, i ta konfirmá e poder ku Murillo ya tin igualando esaki na esun di Ortega, pues ta elevá su rango for di vise presidente pa ko-presidente.
E teksto ta duna poder total na e Presidente i e ko-Presidente, pues ta disidí ku nan dos ta koordiná “e órganonan legislativo, hudisial, elektoral, di kontrol i fiskalisashon, regional i munisipal” dilanti di Konstitushon.
Ortega, eks-gueriero di 79 aña kende a goberná Nicaragua den dékada di 1980 despues dje triunfo di revolushon sandinista, a regresá na poder den 2007. For di e tempu ei, segun su krítikonan, el a start un gobernashon di “diktadura” i “nepotismo” huntu ku su kasá.
“E reforma ta hasi ofisial e desishon di garantisá e suseshon presidensial di Murillo i su yu Laureano Ortega”, segun Manuel Orozco, analista nikaragwense di Diálogo Interamerikano, señalando ku e ko-presidentenan por nombra nan yunan komo vise presidente, loke ántes tabata un elekshon popular.
