SAN JOSE, COSTA RICA (AFP).- E mandatario di Nicaragua, Daniel Ortega, a proponé un reforma konstitushonal ku ta elevá su kasá, e vise presidente Rosario Murillo, na e figura di “ko presidente” i ta oumentá su kontròl riba sosiedat, segun un dokumento na kua medionan di komunikashon a haña akseso.
E proposishon, ku ta oumentá e periodo presidensial for di sinku pa seis aña, a keda someté na Asamblea Nashonal, bou kontròl dje gobernante Frente Sandinista di Liberashon Nashonal (FSLN) i komo tal lo e keda aprobá sin problema.
“E presidensia di e Repúblika ta integrá pa un ko-presidente i un “ko-presidenta”, ku lo keda designá den elekshonnan ku ta selebrá “kada seis aña”, no sinku manera e ta aktualmente, segun e teksto.
Ortega, eks gueriero di 78 aña ku a goberná Nicaragua den dékada di 1980 i ta na poder for di 2007, a keda señalá dor di Merka, Union Europeo i paisnan di
Amérika Latina di ta trahando riba un outokrasia den e pais.
E reforma ta bisa ku “traidornan di e Patria ta pèrdè nashonalidat nikaragwense”, manera e gobièrnu a hasi ku den kareda di 450 polítiko, empresario, periodista, intelektualnan i aktivistanan di derechinan humano i religioso kendenan a keda ekspulsá di Nicaragua i despohá di e nashonalidat despues dje protestanan di 2018.
Ortega i su poderoso kasá ta akusá iglesia, periodistanan i organisashonnan sosial di a apoyá e protestanan di 2018 ku a laga mas di 300 morto, segun Nashonnan Uní, i ku nan ta konsiderá komo intento di gòlpi di estado di spònser pa Washington.
Un total di 278 periodista a sali dje pais den eksilio i ta ehersé nan profeshon for di Costa Rica i Merka, miéntras ku sigur un 50 religioso a keda ekspulsá dje pais i a manda nan prinsipalmente pa Vatikano.
