VARSOVIA, POLONIA, AP.- E aliadonan di OTAN bai di akuerdo pa proporshoná mas apoyo militar na paisnan den Medio Oriente i nort di Afrika ku ta bou di e mira di ekstremismo islámiko.
E sekretario general di OTAN, Jens Stoltenberg, tambe a indiká ku e lidernan di e aliansa a bai di akuerdo pa lansa un mishon naval nobo den Mediteráneo i a komprometé pa mantené un presensia militar sin kambio den Afganistan i finansiá forsanan di seguridat afgano te 2020.
“Awe nos a tuma algun desishon pa fortalesé nos sosionan i proyektá stabilidat mas leu di nos fronteranan”, asina Stoltenberg a bisa na prensa despues di un reunion riba Afganistan riba e segundo dia di kumbre OTAN na Varsovia. El a agregá ku e kousa di e organisashonnan radikal, miónes di persona na Afrika i Medio Oriente a keha “sin kas i indefenso” i ku e gruponan ekstremista tambe ta kulpabel di organisá atakenan terorista na Europa i Merka.
Merka a primintí na proporshoná 3.500 mion dòler pa aña pa finansiá e forsanan afgano i ta spera ku e gobièrnu na Kabul ta kontribuí ku 500 mion dòler. E aliadonan lo proporshoná e sobrá 1.000 mion. E fondo lo mantené un total di 352.000 sòldat di ehérsito afgano i polisnan.
“Nos ta hopi serka i mi ta sigur ku nos ta bai yega na e nivel ei”, asina Stoltenberg a bisa na prensa despues di e reunion tokante Afganistan riba e segundo dia di e kumbre OTAN. Un funshonario di di e atministrashon di Merka a bisa ku OTAN a logra yega na 90% di e meta.
Funshonarionan di e gobièrnu federal di Merka ta konsiderá ku e kantidat di forsanan desplegá pa e mishon di OTAN ta poko mas di 12.000 i Merka a komprometé ku mas o ménos 6.700 di e total ei. E funshonarionan a papia ku kondishon di anonimato debí ku nan no ta outorisá pa duna detayenan di e situashon.