‘No ta na nodi pa ‘schakel’ ku koriente’
WILLEMSTAD.- E kompania Otium ke konstruí un parke di pènel solar grandi na Kòrsou i di e forma akí hasi e energia ku ta generá disponibel riba e ret di koriente lokal di Aqualectra. Na opinion di e kompania, un kontribushon di energia solar lo yuda prevení adaptashonnan grandi den e suministro di koriente ora ku otro fuentenan di energia duradero, manera energia di bientu, kai afó temporalmente.
Djasabra último Aqualectra a mantené un skema di ‘schakel’ ekstenso debí ku bientu a bai drumi loke a lanta bastante diskushon. Segun Otium, e diskushon akí ta demostrá kon importante ta pa sigui diversifiká e produkshon di energia na Kòrsou. Energia solar ta ofresé un posibilidat importante, pasobra no ta dependé di bientu i durante kasi henter dia tin klaridat na Kòrsou.
Ku e parke di pènel solar Otium ke produsí koriente na kantidat grandi i distribuí esaki pa usuarionan via di e ret di elektrisidat lokal di Aqualectra. Di e forma akí energia duradero, ku ta produsí lokal, ta bira parti di e suministro di elektrisidat regular di Kòrsou. “Nos ke kontribuí na un sistema di energia kaminda energia duradero no ta dependé di solamente un fuente di produkshon”, Hans Lute di Otium ta deklará pa EXTRA.
Konseshon
E plannan di Otium ta sinembargo tópiko di un disputa hurídiko ku gobièrnu pa hopi aña kaba. Ta for di 2016 e kompania ta trata di haña un konseshon pa produsí koriente pa medio di un parke solar. Den e añanan ku a sigui a entregá diferente petishon mas pa haña un konseshon. Esun mas resien ta data di 2021.
Korte Komun di Hustisia na sèptèmber 2025 a destruí e desishon pa nenga Otium un konseshon i a disidí ku e minister konserní mester tuma un desishon nobo riba e petishon. Na opinion di Otium, no a duna ehekushon sufisiente na e desishon di Korte Komun i a disidí di bolbe entamá un kaso. Dia 10 di yüni 2026 Korte Komun a disidí ku mas tardá promé di yanüari 2027 mester tuma un desishon nobo riba e petishon di Otium pa un konseshon.
Den e desishon akí e minister, huntu ku otro partidonan envolví, mester traha riba maneho pa repartí e kapasidat di produkshon disponibel. Si no kumpli na tempu ku e desishon di korte, ta riska un multa di 1 mion florin. Pa Otium e veredikto di Korte Komun ta pone bon kla ku mester traha espasio pa formanan nobo di produkshon di energia na Kòrsou.
E kompania ke kontribuí ku e parke solar na un sistema energétiko kaminda diferente fuente duradero ta komplementá otro. “E nesesidat pa suministro konfiabel di elektrisidat ta kresiendo. Nos ta kere ku Kòrsou por hasi muchu mas uso di e energia solar ku ta disponibel tur dia. Ku energia solar riba gran eskala por hasi e produkshon duradero i alabes kontribuí na un suministro di energia mas stabil”, di akuerdo ku Lute .
Otium ta enfatisá ku desaroyo di e parke solar no ta pará lòs di e e infrastruktura energétiko eksistente. Mester por distribuí e elektrisidat produsí via e ret di Aqualectra. Di e forma akí energia solar por bira parti di e suministro regular di koriente i kontribuí na un bahada di e dependensia di energia fosil i di situashonnan klimatológiko ku ta influensia produkshon di otro fuentenan duradero.
