Aña pasá Yanüari nos di Djasabra a entrevistá Juliette (Jullie) Jansen. E dia ei e dama aki ku ta den ‘rolstoel’ a bai bula ku parashüt. Nos ta kòrda ku el a splika e dia ei ku; El a nase ku e un problema di su múskulonan. Esaki a trese kuné, ku Jullie ta limitá i no por kana. E por move su pianan si pero no tin e forsa den su múskulonan pa por para riba nan. E limitashon aki sinembargo no a evitá ku Jullie no ta realisá su soñonan. I un di su soñonan tabata pa bula ku parashüt/Skydive ku el a realisá dia 1e di yanüari último. E ta hiba un bida normal, apesar di su limitashonnan.

Nada ta imposibel….

 

Nada den bida mester ta un estorbo pa nos. Tur loke nos ke nos por. Den entrevista ku Djasabra, Jullie  a papia i konta nos di su hazaña den haltu i ku esaki e kier ta e ehèmpel pa tur hende, no solamente esun ku tin un limitashon. Si bo tin un soño bai pe! Juliette Jansen a konta nos ku el a nase asina aki. Ta un problema ku a originá den su lomba ku ta afektá su múskulonan ku ta pone ku e no por kana. Su kurpa i pianan no tin forsa pa lant’é pa e por kana. Esei ta Jullie su limitashon. El a bishitá skol spesial i einan el a keda te ku 21 aña. Na e skol nan a yud’é pa e por a bai diferente stazje i despues ora el a kaba, e por haña un trabou.

 

Den e enseñansa spesial el a haña estudionan na su nivel.  El a pasa esaki den grupo i kada hende ta haña lès na su nivel. E sistema aki no tabata difísil pa Jullie. El a lanta den un famia ku a sali kuné i nunka a skondé, pasobra e ta diferente di otro muchanan. Semper el a bai tur kaminda, su mama i tata ta sali kuné i asina el a desaroyá un mentalidat ku pa e sinti su meskos ku tur otro hende. Jullie no ta sintié ménos apesar di e limitashon ku e tin.

Eksperensia ekstraordinario…

 

I awor Jullie a bai sambuyá. Nada ta imposibel pa Jullie i el a demostr’é un biaha mas. El a konta nos su eksperensia di sambuyá, esaki huntu ku su instruktor Laura van Loon. (PADI dive instructor

IG: @laura.van.loon)  Mi tin un amiga ku semper ta invitá mi pa e eksperensianan ekstraordinario aki.  Ta trata di Ana i via di dje mi ta haña konekshon pa bai e eksperensianan ekstraordinario pasobra no ta algu normal ku un hende ku limitashon ta hasi tur dia. Dor dje mi a yega den kontakto ku Laura pa bai sambuyá”.

 

Tèstnan promé…

 

Jullie a bisa ku su limitashon no ta strob’é ku nada. Uniko kos e tin di tene kuenta ku sierto adaptashon ku mester hasi promé ku den e kaso aki e bai hasi loke e ke hasi. E ta pasa sierto tèstnan pa wak si ta posibel. Den e kaso aki segun Jullie, el a tuma kontakto ku Laura ku ta ku un tim e tempu ei. Laura a duna oké mesora i a hasi un tèst di snòrkel ku nan. Nan a hasi e tèst aki na un playa mes i no pisina. Einan e por a bisti tur ekipo ku un buseadó ta bisti. E por a sinti e eksperensia ku ta algu kompletamente diferente. Komo Jullie no por kana pa bai den laman e no por a bisti ekipo riba tera pero el a usa un ‘rolstoel’ spesial pa baha den laman kuné. Den laman no ta sinti e peso di e ekiponan. Jullie sa bai laman normalmente.

Un mundu mágiko bou di awa…

 

Durante di e tèst el a siña kon ta hala rosea ku e tanki. No ta nada fásil pasobra den awa bo tin di kòrda ku ta di boka ta hala rosea i no nanishi i p’esei e tèstnan. E dia mes di sambuyá nan a bai pir di Marie Pampoen kaminda a prepará tur ekipo. El a bai ku e ‘rolstoel’ pa baha den awa. El a bisa di a haña bon yudansa pa drenta awa. I e bida bou di laman ta inkreibel. E ta manera un mundu mágiko i diferente di loke ta mira riba tera. Nan a yega un máksimo di 10 meter di profundidat. Den prinsipio el a pensa di lo a yega 5 meter pero tòg a bai mas tantu.

 

Siña hende ku limitashon sambuyá…

Laura a splika ku esaki tabata su promé bia pa a siña un hende ku limitashon pa sambuyá. Laura a bisa ku pe tabata importante pa Jullie por sintié kómodo ora nan bai sambuyá. I p’esei e tèstnan promé. A dun’é e chèns pa konosé e ekiponan i kon ta hala rosea for di e tankinan di airu pasobra ta netamente esei ta hasi hende nèrvioso. I si Jullie por a hasié, tur hende por. Laura tin 3 aña ta siña hende sambuyá. E tabata un reto pe i esei el a gusta mas. Laura sa siña mucha di 8 aña sambuyá i e ta diferente i p’esei ora el a hañ’é ku Jullie el a bai e reto. Tabata Laura i Ana ku a bai sambuyá ku Jullie i tambe un persona ku kámara. Bou di laman semper nan wowo a keda riba Jullie pa tur kos kana bon. I segun Laura loke Jullie a hasi ta habri e porta pa otro ku tambe ke eksperensiá e sambuyamentu aki. Tur hende por ta solamente e salú mental mester ta bon i a hasi e tèstnan promé bai profundidat ku e hende.

 

Kloustrofobia…

 

Laura a remarká mas aleu ku hende ta kere ku komo nan tin kloustrofobia nan no por sambuyá. El a bisa ku den su kaso e tambe tabatin kloustrofobia. E tabatin temor di drenta un left. Pero den e kaso aki, bou di awa ta algu diferente. E ta sintié liber bou di awa, e ta sinti ku e ta den kontròl. I p’esei un hende ku tin kloustrofobia lo mester purba riba tera promé, a wak kon e halamentu di rosea ta bai.

 

Dal e paso…

Jullie a bisa ku Laura a lag’é sintié kómodo den e sambuyamentu. Laura semper a keda banda di dje i ta lag’é sintié sigur bou di laman. I p’esei Jullie ke sa kiko ta stroba otro hende pa tambe tuma e kurashi i dal e stap pa bai sambuyá.

 

Subi Kristofel…

 

Jullie a bisa ku e tin hopi kos ku e ke hasi. Jullie awor a pone otro reto su dilanti. E ke yega tòp di Seru Kristofel. E no sa kon esei lo sosodé i el a hinka su amiga Ana tambe den un situashon pasobra te ta esun ku ta push’é i organisá tur kos pe logra su metanan. Jullie ta spera ku un dia e tambe por wak Kòrsou for di haltu di Seru Kristof.

 

No deskurashá…

 

I loke Jullie por bisa na otronan ta “un konseho pa tur hende i no pa hende limitá so, nos a bin na mundu pa biba un bida felis i kontentu, hasiendo loke nos ta gusta i no pa hende pero hasié pa bo ta kontentu. I esei mi ke bisa, si bo ta gusta algu i bo ke hasié, hasié, no laga bo limitashon i no laga hende deskurashá bu di loke bo ke hasi. Bo tei awe i mañan bo no sa”.

LAGA UN KOMENTARIO

Please enter your comment!
Please enter your name here