Andy America
Nos siguiente tata pa e luna di yüni, luna di tata ta Andy America. Andy ta relatá su eksperensia komo tata, kon el a eduká su yunan i kisas asta kua di e yunan ta preferí. Andy ta kasá ku Charetti America-Francisca i tin sinku yu. El a bisa ku e tin un man yen di yu i esei ta un palabrashon ku su kasá i kada un ta un bendishon.
Ora bo a sa ku bo ta bai bira tata, kon bo a sinti bu?; Andy a konta ku na aña 2000 el a kasa i 2 aña despues, su kasá a sali na estado. “Di un banda mi tabatin goso i di otro banda tur mi miedu i temornan a bin ariba. Bo ta sinti un responsabilidat. Den e kamber kaminda mi yu a nase, ami no por a mira ta yu hòmber òf yu muhé, mi a bira blanku blanku i kasi a bai fo’i mi. Mi a sinti e peso di responsabilidat. Mi a sinti ku awor mi tin di sòru pa otro ser humano i e no a kita nunka mas”. Andy ta sigui splika ku dado momentu e ta kòrda e promé yu tabatin sleim i e ta pega. Su kasá ta dun’é keriendo ku outomátikamente Andy sa kiko pa hasi. I e no por drenta pániko pero mester atendé.
Promé ku bo a bira tata bo a ferwaktu ku ta asina aki lo bai ta?; El a kontestá ku No, e no tabatin idea kon lo bai ta, e mes no tabatin eksperensia ku tata i bira kasá mes tabata un stap grandi. E no ta kòrda di a haña e lès ei na skol, Andy a bisa ku un sonrisa. El a bisa di no tabata sa kiko ferwaktu ètòl.
Andy tin 5 yu di kual 2 yu muhé i 3 yu hòmber, tin un diferensia den eduká yu muhé i yu hòmber; Pa Andy tin e diferensia aki. Su yu muhé mas grandi ta bisa esnan mas chikí ku nan tin di yam’é danki pasobra el a trein papa pa e ta manera e ta. I e tin rason pasobra Andy ta kere ku Dios sa kiko e mester i Dios a dun’é un yu muhé promé pasobra e yu aki a kue su kurason i moldi’é, el a hasié moli moli i awor e yu hòmbernan ta hañ’é mihó. Yu muhé ta yu di tata pasobra tur kos ta drei rònt di nan tata i e yu hòmber ta yu di mama pasobra kon ku bai bin nan ta defendé nan mama, nan ta selebrá nan mama i skucha e mama mas. E yu muhé ta hasi manera e ta skucha pero tòg e ta hasi manera e ke. Tin un diferensia masha grandi den yu muhé i yu hòmber sigur i Andy por bisa ku su dos yu muhénan mas grandi ta esnan ku a form’é pa e por ta un bon tata.
Bo tin un yu preferí?; Otro smail riba Andy su kara i el a kontestá ku esei ta un pregunta ku e ta tende hopi na kas i su yunan ta konvensí ku e tin un yu preferí. Tin algu den kada un di su yunan; e tin e yu ku ta ward’é yega kas pa kita su sapatu i mea, tin e otro yu ku ora Andy yama e ta e promé ku ta bini pa hasi fabor; e tin e yu ku pars’é i ta kòrd’é muchu i asta demasiado riba e mes; e yu ku ta su terapista ku ta tuma tempu pa papia kuné; i e tin e promé yu den sierto kosnan. E no por bisa kua ta preferí.
Formulando e pregunta otro nos kier a sa di Andy si tin un yu ku ta mas pegá kuné; Esei si ta asina segun Andy. E yu aki ta asta bis’é tin bia ku e ta sinti su falta, e tabata sinta den kas i a pensa ku e ta sinti papa su falta i ku nan tin di pasa mas tempu ku otro.
Kiko ta e kos prinsipal ku Andy a hinka den su yunan; El a siña su yunan karga responsabilidat. El a siña nan pa no tene otro responsabel pa bo felisidat ni bo fayo i frakasonan pero siña karga bo responsabilidat. Bo a bini bo so riba e mundu aki i bo tin di karga bo responsabilidat. Pa Andy esei ta masha importante.
Bo ta un tata strèn?; Si, Andy a kontestá nos. El a bisa ku e tin un ‘background’ polisial i esei ta pone ku disiplina ta hopi importante. Por ehèmpel su kasá ta bai lanta e yunan mainta i ku un bos abou e ta keda yama un pa un na nan nòmber. Ora nada sosodé, Andy ta yega i ta bisa simplemente “Ban” i tur yu ta bula lanta. Pero e parti di strèn pa Andy ta nifiká ku si nan palabrá algu, nan ta kumpli kuné tambe. Su yunan ta wak televishon den siman pasobra televishon ta hasi hende floho pa pensa. Riba djabièrnè e yunan ta wak televishon pasobra e ora ei ta ‘movie night’ i nan por skohe kiko nan ke wak. Su yunan ta lesa masha hopi. Andy ta strèn pa loke ta trata ora di drumi pero tòg ora e habri porta anochi i haña lus sendé i e yunan ta lesa buki e por ‘kijk door de vingers’. Pero su yunan lo bisa ku Andy ta strèn.
Den 22 aña el a mira un kambio di e esfuerso ku un tata tin di hasi pa eduká su yunan; Pa Andy Si pasobra tin mas distraishon awor aki. Tempu a kambia hopi. Por ehèmpel telefòn no a kaba di proba su mes pero nos ta konfia nos yunan kuné. I e tin efekto riba e muchanan i ta un desafio pa eduká bo yu awendia dor di e interferensia di media sosial, telefòn. Pero algu a kambia den dje mas tambe pasobra e tabata operá a base di miedu pa loke a pasa kuné no pasa su yu, e tabata hopi pa tene kuidou i evitá. Awor aki e tin mas konfiansa den eduká su yunan.
Kon bo a dil ku media sosial i bo yunan?; Andy a konta nos ku el a studia esnan ku a krea media sosial i nan mes no ta eksponé nan yunan na e kosnan aki. I awor aki mirando otro hende su yunan i e efekto riba nan e ta kontentu di no a eksponé su yunan na esaki. Su yu muhé di mas grandi ora e tabatin 14 aña tabata bai MIL i Andy a bis’é ora e bai over lo kumpra un telefòn pe. Ora Andy a kumpra e telefòn pa e yu, el a kuminsá bai atras i puntonan a kuminsá bin malu i ora el a sinta papia ku su yu, esaki mes a yora i bis’é dikon el a kumpra e telefòn pe.
Teniendo na kuenta ku Andy tabata polis, e tin yu ku a sigui su paso?; El a kontestá ku un No dudá. Pasobra tin ora nan ta manera ke bai den e direkshon ei i ora puntra nan kiko nan ke bira nan ta bisa Polis, Pastor i Kunukero, ku ta loke Andy tabata i ta. E no sa tampoko ku e ke pa su yunan bai e direkshon ei. Pero e ke pa nan bira e kos ku nan a bin pa bira den e mundu aki. I ta ora nan bira grandi lo sa esei.
Bo ke pa e partner ku bo yunan muhé haña ta manera bo?; El a kontestá esei ku Si, sigur e vershon awor aki. E sa ku Charetti tabatin hopi hopi trabou kuné. Charetti a namorá di un mucha hòmber ku no tabata sa kiko ta un hòmber ainda i e ta bisa su yu muhénan ku si nan haña un Boy e ta hasi nan su Toy i p’esei ta sigur pa haña un hòmber pasobra por karga responsabilidat, e ta un provedor, protektor i por papia. I Charetti tabatin tiki trabou ku Andy pa yega einan pero ku e vershon di Andy 2.0 e ke pa su yunan muhé haña un vershon manera e.
Lo bo influensiá e parti ei?; Andy a kontestá ku e no sa ku e lo por pasobra el a purba. Segun Andy si bo hasi manera bo no ta ‘eens’ i bai kontra, ta e ora ei nan ta bai den e direkshon ei. E ta kere ku el a duna e yunan e ‘tools’ pa nan mes por skohe. E tabatin un eksperensia ku su yu ku el a korigié riba algu i e yu a yora i a sinti ku Andy tabata inhustu. Pero dado momentu a dal e ku palabra i Andy tambe a kuminsá yora. El a bisa su yu yorando ku eigenlijk niun hende a siñ’é pa ta tata. E yu a stòp di yora, seka su lágrimanan i bisa Andy “papa play it cool” i djis hasi manera bo sa. Andy no por a kontené harí riba e historia ei ku e konklushon tabata ku si bo no sa, hasi manera bo sa. E no ta kere e lo tin influensia riba e persona ku su yunan skohe, pero e ta kere si ku nan ta buska nan mayornan su aprobashon. E ta ripará ku e yunan muhé ta trese e amigu rondó di nan i pa sa kiko nan ta pensa i asina buska nan aprobashon.
I awor e yunan hòmber?; Andy ta kere ku si. El a bisa su kasá ku el a hasi su parti ku e yunan muhé i awor ta e mama pa ku e yunan hòmber. E yunan hòmber ainda ta basta chikí i lo tin un tempu promé nan trese un hende ku nan gusta kas. Loke si Andy ta para ariba ta ku nan no ta bai hasi ku yu di mama algu ku ku nan no ke pa hasi ku nan yu. Por ehèmpel si bo ke eksplorá hasié ku bo wowo i laga bo man na bo kurpa, pasobra si no ta abo ta esun e mester keda intakto atras pa esun ku si ta esun. I p’esei Andy lo strès pa e yunan hòmber tin un aktitut loyal i di prinsipio den manera di anda ku muchanan muhé.
Komo tata, tabatin algu ku bo a hasi ku bo yunan ku mas bien bo tabata ke pa ta otro?; Si, i kada bes e ta ripití esaki. Su kasá i yunan mas grandi sa esaki. Su yu hòmber chikí a hasi algu ku a kòrda Andy riba algu ku e tambe a hasi na chikitu i el a sut’é. I ora el a kaba di sut’é Andy a sintié. Ta nèt e kosnan ku el a bisa ku e no ta hasi ta nèt esei el a hasié. El a saka un trouma di dje di hopi sota ku el a haña ta chikitu. Esei a sosodé un bia i ora el a kaba di sut’é, e mucha a bira wak i puntr’é si el a sut’é pasobra el a hasi mala mucha? Te awe e bista i bos ei ta persiguí Andy i nunka mas el a suta su yu. E ta sinti ku e no mester a suta e yu ei asina duru i no ta loke e lo tabata ke.
Bo ta un tata ehemplar?; Si, pasobra segun Andy semper e ke hasi mihó por ehèmpel nan yunan a lanta i ta papia tur kos ku nan. I tur bia a mira e mihó vershon di Andy, E ta haña ku e por dediká mas tempu na nan, e ta haña ku tin bia e tin mas pasenshi ku otro hende ku e tin ku su yunan, tin hende ta hasi fout horibel pero tòg Andy ta sigui bai ku nan pero serka su yunan ta otro. E ta spera ku e ta realmente un ehèmpel di loke su yunan mester. Andy ta hopi orguyoso di su yunan. Kada un ta artikulá i papia bon, nan ta dominá idioma, nan ta hustu, honesto i no ta ninga ku nan no ta hasi fout pero nan ta pidi pordon, nan tin bon kurason, lihé pa kompartí. E ta orguyoso di nan.
Kiko e lo bisa un grupo di tata su dilanti; Kura, sana, pasobra nada ku bo no kura di dje bo no por duna, i miéntras bo no kura e eksperensianan ku bo a pasa aden bo ta pasa pa e siguiente generashon. Mester realisá ku tur loke logra para den e generashon aki komo tata, nos yunan ta skapa di dje. Si komo tata bo ta ‘struggle’ ku pornografia, bo yunan tambe lo ‘struggle’ ku pornografia, si bo ta ‘struggle’ ku bebementu di mas i sin kontròl bo yunan tambe lo pasa aden. Meskos ku a ataká bo antepasadonan, lo ataká bo opa, bo tata i bo tambe si bo no kura i sana di dje. Kiko bo logra para den e generashon aki bo ta logra para pa e próksimo generashon.
