ORANJESTAD.- Polis di Aruba ta informá ku un bia mas a registrá un kaso tristu i lamentabel, kaminda un turista a pèrdè su bida. E informe ofisial ta indiká ku djabièrnè mèrdia pa mas o ménos 12:35 di mèrdia sentral di polis a haña informashon di un aksidente serio ku a tuma lugá ku un ATV na altura di Black Stone Beach.
Mesora a dirigí un patruya di Santa Cruz i tambe ambulans i brantwer na e sitio. Na yegada na e sitio a bin topa un situashon unda un hende muhé turista no ta duna señal di bida mas. Personal di ambulans a hasi nan máksimo esfuerso, pero no por a hasi nada mas pa e víktima. Spesialista di tráfiko i polis tékniko a presentá na sitio pa hasi investigashon huntu ku slachtofferhulp ku a duna guia na e famia.
Dr.forénsiko Wemejier a konstatá morto di e turista femenino V.M.L. di nashonalidat merikano, di 39 aña. Polis, brantwer i ambulans mester a a hasi hopi trabou pa ku reskatá e víktima. Kuerpo Polisial Aruba ta manda palabra di kondolensia na famia di e defuntu.
