BRUSELAS, AP.- E kantidat di migrantenan ku ta drenta Europa desde Turkia a oumentá signifikativamente aña pasá dor ku mayoria hende ta hui di guera na Siria i Afganistan. E migrantenan kier purba drenta Gresia, segun indikashon di e agensia di frontera di Union Europeo.

Mas di 82.000 persona a purba drenta Europa ilegalmente den 2019. Esaki ta 46% mas ku aña pasa, segun Fabrice Leggeri, e direktor ehekutivo di Frontex.

“Esaki ta spesialmente debí na e situashon na Siria, pero tambe dor di e instabilidat na Afganistan”, asina Leggeri a bisa na prensa. El a elogiá Wardakosta turko, indikando ku e organisashon ta “traha bon” pa kapturá migrantenan ku kier drenta Europa.

Union Europeo a bai di akuerdo pa entregá 6.000 mion euro na Turkia pa yuda refugiadonan sirio i otro insentivonan pa e gobièrnu di Ankara impedí ku migrantenan ta krusa i yega Gresia. Pero Gresia tambe ta sufriendo di un sobrepoblashon riba su kamponan di refugiado.

E presidente turko Recep Tayyip Erdogan a bisa ku su pais no por akohé e 3,6 mion di refugiadonan sirio sin yudansa i a menasá ku e ta dispuesto na “habri porta” pa e migrantenan aki kontinuá ku nan travesia pa Europa. Turkia kier mas fondo di Union Europeo.

Ankara a pidi pa Europa proveé mas yudansa polítiko i finansiero pa krea un “zona safe” na nort di Siria pa duna refugio na esnan ku ta hui di e konflikto, pero e europeonan no kier partisipá den e plan aki.

 

LAGA UN KOMENTARIO

Please enter your comment!
Please enter your name here