Oumento di akseins i OB lo ta devastador pa turismo

CHATA ta ekspresá su preokupashon pa posibel medidanan

WILLEMSTAD.- CHATA ta poko preokupá ku e anunsio dje oumento di sierto rekargonan di impuesto, den kaso aki por ehèmpel e oumento di impuesto riba sigaria, alkohòl i un oumento di OB riba sierto produktonan. CHATA ta bisa ku un oumentonan proponé kasi por ser konsiderá komo oumentonan di shen porshento di e tarifanan aktual pa e konsumidó, i tambe pa e bishitantenan djafó. CHATA ta preokupá ku e preis final pa e konsumidó. Por ehèmpel, a base di e kambionan anunsiá un bòter di serbes lo bira dòbel na preis i lo bai kosta mesun tantu ku un glas di bibida stèrki djawe.

Un turista lo tin di bai paga fl.11.- pa un serbes lokal en bes di fl.6.-. Un kaha di serbes ku normalmente ta kosta fl.41,95 lo bai kosta na un montante di fl.63.-. E ehèmpelnan ei por ser konsiderá komo un kresementu desbalansá i irealístiko. Es mas, un bòter di bibida stèrki ku ta ser bendé pa fl.25.- awe lo bira fl.43.-. CHATA ta kere ku e medidanan anunsiá aki lo bai hasi impakto negativo riba forsa di kompra pa tantu hendenan lokal komo bishitante i lo no kontribuí na e ophetivo pa bira un isla kompetitivo unda tin mester di negoshi.

Oumento di OB:

Mas aleu tambe CHATA a tuma nota dje posibilidat di un oumento di OB. E intenshon ta pa tur produkto ku tin 6% i 7% subi na 9%. Pero e impuesto aki ku tin intenshon di subi tambe lo bai tin impakto negativo. E produktonan manera paña, sapatu, make-up, produktonan di luho i komementu afó, ku ta dependé hopi di e gastunan dje industria turístiko lo kondusí na ménos entrada pa establesimentunan i tambe e poder di kompra dje turista lo baha komo resultado di impuestonan mas haltu.

Segun CHATA, nos ekonomia lo no por karga e èkstra peso aki i den un tempu kaminda solamente a mira un bahada den desaroyo ekonómiko. E medidanan ariba menshoná lo ta devastador pa nos ekonomia.

 

SHARE

LEAVE A REPLY