PANAMA CITY, PANAMA, AFP.- E kantidat di muchanan migrante ku ta purba drenta Merka via di México a multipliká ku sigur nuebe biaha kompará ku e kantidat na komienso di aña, segun indikashon di UNICEF djaluna.
E oumento di 380 pa 3500 mucha registrá na resepshon di sentronan na sùit di frontera ta abrumador pa e fasilidatnan, segun indikashon di e agensia.
“Mi kurason ta kibra ora mi mira sufrimentu di e muchanan hóben, i asta beibi, na frontera di México ku Merka”, asina Jean Gough, direktor di e fondo enkargá ku Latinoamérika i Karibe a bisa.
Outoridat mehikano ta registrando un promedio di 275 mucha migrante pa dia, sea wardando pa krusa i drenta Merka òf wardando riba deportashon, segun indikashon di UNICEF. E menornan ta forma 30% di e migrantenan ku ta bini di Hondúras, Guatemala, El Salvador i México. Esaki ta e figura di mas haltu registrá pa menornan migrante na frontera.
UNICEF a bisa ku mester establesé mas sentro pa akohé migrantenan na frontera i mehora kondishonnan sosial den Sentroamerika i regionnan pober den México pa redusí migrashon.
