Riba e potrètnan por mira hendenan ku a reuní pa despedí di e lider supremo Ayatolah Jamenei durante di entiero na Gran Mosala na Tehran
TEHRAN, IRAN, AFP.- Dirigentenan iraní a uni ayera míles di persona ku a asistí na un plegaria na Tehran pa tuma despedida di defuntu lider supremo Ali Jamenei, e di dos dia di seremonianan di entiero marká pa ousensia di su yu i e susesor Mojtaba.
Míles di persona a reuní dilanti d e kompleho enorme di Gran Mosala, kaminda a pone e kaha di morto di ayatola dekorá ku e kolónan bèrdè, blanku i kòrá di e bandera di Iran.
Tres yu hòmber di Jamenei, Masud, Mosfata i Meysam a hasi nan aparishon públiko den e homenahe, marka pa ousensia di e susesor Mojtaba. Jamenei a goberná e repúblika islámiko for di 1989 te na su morto, na 86 aña di edat den un bombardeo di Merka i Israel dia 28 di febrüari, e promé dia di e guera kontra Iran.
Huntu ku e kaha di morto di Jamenei a pone algun bòrchi di su famianan morto tambe den e bombardeo, un ta su yu muhé, un suegro, un suegra i un nietu di 14 luna. E lider supremo nobo di 56 aña ku a keda heridá den e atakenan no a mira den públiko for di e fecha menshoná i solamente el a saka mensahenan skibí.
Den promé fila dilanti tabatin e presidente iraní Masud Pezeshkian i e lider influyente di parlamento Mohamad Baqer Qalibaf , hefe di ekipo di negoshashon ku Merka.
