SYDNEY, AP.- Vários mishon diplomátiko estranhero a wòrdu evakuá den siudatnan oustraliano di Melbourne i Canberra djárason despues di risibí paketenan ku ta kontené sustansianan sospechoso.
Polis, bombero i ambulans a akudí vários konsulado di Melbourne, inkluyendo esnan di India, Alemania, Italia, Spaña i Surkorea. Funshonarionan den mishonnan merikano i siudat den e siudat a indiká di a haña e paketenan.
E wèpsait di Vic Emergency, kual ta konsistí di agensianan di emergensia di estado di Victoria, a indiká ku tabatin por lo ménos 10 insidente di “materialnan peligroso” den e siudat.
No tabatin indikashon di herido den e mishonnan den ámbos siudat.
Polis Federal di Oustralia a indiká den un deklarashon ku e sirkunstansianan ta wòrdu investigá.
E kadena Australian Broadcasting Corp., a reportá ku un empleado di konsulado di New Zealand na Melbourne a bisa ku e paketenan en kuestion a wòrdu identifiká komo “asbèst”.
ABC a reportá ku paketenan similar a wòrdu mandá na ofisinanan diplomátiko na Melbourne di Pakistan i posiblemente Gresia, Fransia i Hong Kong. El a bisa ku e embahada israelí na Canberra tambe a haña un pakete sospechoso.
Empleado i diplomátikonan a wòrdu outorisá pa drenta e edifisio, despues ku outoridat a deklará esaki komo safe.