Alexander (Alex) Fares

Beautiful Minds

Dia 2 di aprel ta dia internashonal di outismo. Un dia pa nos propagá e konsientisashon pa trese komprondementu kiko ta outismo. Den e kuadro aki Alex Fares fundadó di e fundashon Beautiful Minds ta splika kiko ta outismo i kiko su fundashon ta para pe.

 

Outismo ta poko difísil pa splika. Ta un pregunta ku e ta hañ’é hopi konfrontá kuné. El a splika kon e ta afektá un hende. E definishon ta un ‘psygische stoornis’ ku e ta nase i muri kuné. E grado ta diferensiá di kada hende i e síntomanan tambe ta varia. Bo no ta haña 2 outista mesun kos pero tin diferensia. Ounke tin vários kos, esta síntomanan ku e outistanan tin komun. Alex a splika ku esakinan ta e promé i esun mas importante ta “e no por komuniká na drechi sosialmente ku otro hende”. Esaki ta un punto masha importante i asta Alex tabatin problema pa komuniká bon i sosialisá ku hende. E parti ei di no por sosialisá ta afektá e outista di forma ku bo no por spera. E ta limitá den vários faseta di su bida.

 

Síntoma….

E otro síntoma ta e hende ku outismo no por wak otro den wowo direktamente. E ta un señal basta komun. Otro síntomanan ta ku no por komuniká bon ku hende. E punto mas importante ta e komunikashon ku hende. I si bo no por komuniká na drechi ku hende, e kombersashonnan ku bo mester tene ku hende tur dia i e ta importante den bida, si no por komuniká na drechi tin vários kos malu ku por pasa.


Kombersashon….

Hende ku outismo por kuminsá papia di vários tópiko ku no tin nada di aber ku e  kombersashon. E outista ta bai dip den e tópiko i e konteksto di e kombersashon no tabata apropiá pa e kombersashon. E otro ehèmpel ku den su kaso ta afekt’é hopi ta ku e no por volg kombersashonnan hopi bon. Den kombersashon normal entre dos hende, e hendenan por kambia di tópiko masha lihé mes. Por papia por ehèmpel di wer i mei mei di dje ta kuminsá papia di e bisiña i e kombersashon ta kambia i mei mei di e kombersashon ta kuminsá papia di e situashon na Venezuela. Den kombersashon normal ta bula di tópiko i esei ta problema pa hopi hende ku outismo. Den Alex su kaso ora e kuminsá papia di un tópiko e ta konsentrá pa ora e papia di dje e duna e informashon ku e sa i pa e e konosementu ku e tin por keda transmití pa e otro hende. I p’esei ora e kuminsá di un tópiko e ta bai riba dje.

 

No por bula di un tópiko pa otro….

Esun ku no tin outismo ta bula di un tópiko pa otro. Pero serka e outista e no por bula di un tópiko pa otro. Serka outista un di e maneranan pa anda bon kuné ta rutina. I e ta un di e tratamentunan mas mihó pa un hende ku outista bai dor di dje pa e biba mas efisiente posibel. Un outista ta pone tur kos kla di un tópiko i ta saka tur kos ku no tin di aber ku e tópiko afó. Esaki ta un proseso figo serka e outista. Ora e proseso normal ta kambia di un pa otro tópiko ta brua e outista. I e outista ku brua por manifestá komportashonnan straño. E por den su mes mundu i ta sera su mes kompletamente i e hende ku ta pensa ku e no ta paga tinu na e hende i e kombersashon ta para einan.

 

No por meskla fásil….

Esaki ta pone ku e outista ku por papia no por meskla su mes fásil ku e hende rondó di dje. Outista ta un diagnóstiko basá riba graduashon. Spectrum ta nifiká ku outista ta afektá kada hende diferente, di mas severo te ménos severo. Den su kaso e tin e ménos severo. Esun severo ta e hende no por papia i mester di hende pa kuid’é 24 ora i 7 dia pa siman. E outista ei tin diferente nòmber mes. E outista den nan kaso ta pone ku e prosedura ta mihó manda nan un kas di kuido pa edukashon mas spesialisá. E outista ku no ta severo i ku por papia i ku por bai skol i ora bira grandi por haña un trabou tambe ta eksistí. Alex ta spera e tambe por haña un trabou. E outista no asina severo su bida por bai atras i wòrdu stagna dor di su ambiente.

 

Afektá su bida…

Esaki a afektá Alex sigur. El a bai skol normal i te na Havo el a ripará ku e outismo a afektá e mes i e klas. Den su kaso e por a siña bon pero apesar di esei e manera ku e tabata anda ku e dosente i koleganan den klas, hopi biaha e ta keda tené atras òf tene klas atras. Alex tabata konsiente di dje i p’esei ta importante pa bo tin e diagnóstiko promé.

 

I esei su fundashon ta pone énfasis riba dje esta e diagnóstiko. E ta un desviashon síkiko i tin vários di nan, i vários di nan ta kaso mesun síntoma ku di outismo. I ora kere ku e persona tin outismo pasobra e no ta sosialisá bon i no ta wak den bo kara pero tòg ora e bai sikiater i bai hasi diagnóstiko ta resultá ku e no tin outismo òf tin e kompará ku otro ‘aandoening’.

 

Fundashon komo sosten…

E motibu dikon el a lanta e fundashon Beautiful Minds ta pa e duna informashon i konsientisashon ku tin hendenan manera e ta eksistí. Den su eksperensia el a haña sa ku tin vários hende ku outismo i no solamente mucha. No ta mucha so ounke nos ta kere asina i ta lubidá riba e adultonan. Bo ta nase i muri ku outismo i tin adulto ku outismo i ta hendenan ku ta kana rònt normal. Tin profeshonalnan di vários tereno den sosiedat ta keda afektá ku outismo. I ounke nan ta profeshonal nan tin e problemanan ei ainda i e ta kousa ku nan bida privá i nan relashon ku kasá i yunan no ta bai bon. Despues di skol bida ta sigui i e outismo por stroba e relashon ku e famia. I esei e ke pone énfasis riba dje ku outismo tei pa keda.

 

Outismo no ta manera un habrimentu di barika i bo ta haña ku remedi i kura. Tin tratamentunan ku por ataká e síntomanan pa asina e hende por mas mihó. I nan por yuda te sierto grado pero e no ta nifiká bo ta kura di dje. Outismo ta bastante hóben i nos konosementu sientífiko di outismo ta basta yòn tambe.

 

Aseptashon…

Pero aseptashon ta importante pa e outista. Alex ta bishitá skolnan hopi. No ku e outismo ta konsentrá na skol pero einan nan ta resultá aun mas. Skol ta un periodo kaminda tin di dil ku mucha, dosente i lès i e outismo por afektá esun ku outismo mas. I p’esei e ta papia ku dosentenan. Kasi na tur skol tin un òf dos dosente ku ta ripará ku tin alumno ku outismo. Pero promé yega asina leu e mucha mester keda diagnostiká. Por sospechá si pero e diagnóstiko ta sumamente importante. Hopi hende por sospechá pero mester bai sikiater pa keda diagnostiká. I den kaso di dosentenan komo e mucha no a keda diagnostiká nan tin miedu di bida e mayornan. Esaki pasobra kada mayor no ke tende ku nan yu tin un “aandoening”. Tin mayornan no ke tende esei i p’esei mes e dosentenan no ta aserká e mayornan fásilmente. Esaki na su turno por tin konsekuensia pa e mucha.

 

Tratamentu for di chikí…

Den kaso di Alex, el a keda diagnostiká ku outismo ku su 15 aña di edat. E ta kalifiká esaki un edat basta bieu den e mundu di outismo. Hopi biaha e síntomanan ta manifestá ku 3 i 5 aña. E ora ei ta nota esakinan i por pone e diagnóstiko. Ora haña sa mas tempran e tratamentunan ku por bai guia e mucha mas tempran pa aweró e ta hende grandi kon pa e biba un bida tòg efektivo. Mas lat hende haña sa ménos tempu e ta haña pa e tòg anda i haña tratamentunan i habilidatnan pa e trafiká den komunidat. Nos tur tin di drenta den komunidat i nos tin di haña nos manera den dje pa asina bira siudadanonan produktivo pa nos mes i pa sosiedat. I ku e tratamentu mas tempran bo no ta bira super hero i no ta haña kura pero a lo menos por haña un trabou pasobra bo sa kiko tene kuenta kuné.

 

Informá esnan rònt di dje….

E outista mester anda ku hopi hende i p’esei ta importante pa esnan rònt di dje sa ku e ta outista. E ta algu masha importante pasobra e ta yuda pa informá e hendenan pa nan por yuda bu i komprondé bu. Ta importante por ehèmpel pa e dosente sa i mas e sa di e problemanan di e outista mas mihó e por adaptá su mes i komprondé e outista mihó. Niun hende por ferwaktu ku un hende ta bira eksperto den e tópiko di outismo. E ta un tópiko kompliká pero si e hende sa ku e otro tin outismo e por tene kuenta ku e persona mas lihé. Ora e outista ta mucha i e hendenan rondó di dje ta e mucha ta masha cute i tur hende ke kuida di dje pero ora e bira grandi e ta pèrdè e karakterístikanan ei. I e hendenan rondó ku tabata pensa ku e ta cute i tutu i tabata tene konsiderashon kuné eseinan tambe ta hala kita. Esakinan ta loke Alex mes a eksperensiá. Awor aki e tin 21 aña i den su eksperensia e tambe a pasa dor di e fase ei. Si e hende sa ku bo tin outismo ounke e konsiderashon ta ménos, e hende ta komprondé mas.

 

Skol tabata manera un fièrnu….

Komo ehèmpel Alex a splika ku el a kaba su Havo 4 pero e no por a bai skol. Skol tabata un fièrnu pe. Pe no tabata leuk mas i e no kier a sigui pero kier a haña su diploma. El a bai gobièrnu i a hasi un ‘staats examen’. For di kas el a studia i durante di eksámen el a hasi e mesun eksámen i tin e mesun diploma. Un di su eksperensia ta ku e mester a hasi un turno oral pa su eksámen di Havo. El a siña hopi duru pa su eksámennan i tabata sa tur kos masha bon pero ora e turno a yega e komunikashon no a bai manera a ferwagt. E promé turno oral no a bai manera e tabata ke. Su mama a konseh’é pa e bisa e siguiente bia pa bisa e hendenan ku e tin outismo i bisa aserka kon e outismo ta afektá su presentashon. Esaki Alexa a splika. Su formulashon di frase no tabata bai asina lihé i ora e keda ketu no ta pasobra e no sa pero pasobra e tabata tuma su tempu pa e formulá. Esaki a pone ku su turno oralnan a bai bon. Esaki a trese kuné ku e dosentenan a tene konsiderashon kuné pasobra el a informá di su outismo.

Aseptashon ta importante, diagnóstiko ta importante pero e hendenan ku ta rondoná bu

ku ta bo mayornan mester sa pa tene lo mínimo na konsiderashon. Tur habilidat ku bo por desaroyá ta yuda ku algu.

 

Tuma kontakto

Alex a bisa ku tur hende ku ke informashon por tuma kontakto kuné via di su facebook Beautiful Minds Curaçao i e lo rospondé. Tambe e ta konsehá esnan ku a haña sa ku nan yu tin outismo si nan ke un ke otro konseho òf papia ku un hende ku a pasa den mesun situashon por tuma kontakto kuné. I den e guia, e ta kere ku mayornan tambe ta importante pa haña e sosten aki. E ta kòrda ku tempu su mama a haña sa ku e tin outismo no tabata nada leuk pa e mama i el a sinta ku e tabatin mester di hende pa papia kuné. Meskos ku e dosente ku no ta solamente e mucha outista e tin pero tin 28 mucha mas. E lèk di por papia ku hende i pa e hende por a duna su mama òf otro mayornan konseho, bisa nan ku Mundu no a kaba i pa buska solushonnan. Esaki ta loke e fundashon aki ta purba na hasi esta duna mas informashon riba outismo. Mas informá, mihó e persona por funshoná.

LAGA UN KOMENTARIO

Please enter your comment!
Please enter your name here