LISBOA, PORTUGAL, AP.- Un kandela di mondi riba Islas Canarias di Spaña a provoká vlamnan di kandela di 50 meter haltu djaluna, obligando ekiponan di reskate pa evakuá mas di 9.000 persona, segun informashon di outoridat.
E kandela, deskribí pa outoridat lokal komo “un mònster” ta krusando e mondinan seku rumbo pa e Parke Natural di Tamadaba, konsiderá komo un hoya di Gran Canaria, un isla volkániko riba e archipiélago den oséano Atlántiko na nortwèst di Afrika.
Famoso pa su playa i serunan, Gran Canaria i su kapital, Las Palmas, ta destinashonnan di fakansi popular na Europa, pero no a reportá evakuashon di ningun hotèl.
E presidente di Canarias, Angel Victor Torres, a bisa ku 1.100 bombero a desplegá huntu ku 16 avion ku ta spùit awa pa kombatí e kandela ku a kuminsá djasabra atardi. E gobièrnu lokal a bisa ku 6.000 hèktar a wòrdu karbonisá den solamente 48 ora, e pueblonan den e área a wòrdu evakuá i a sera diferente kaminda.
Gran Canaria ta e di tres isla mas grandi di e archipiélago di Islas Canarias, ku a 150 kilometer na wèst di Afrika. Ku 50 kilometer di diameter, Gran Canaria tin un pueblo di 850.000 habitante. Kandelanan di mondi ta komun na sùit di Europa durante e lunanan seku di zomer.
