PARIS, Fransia (AFP).- Inhalashon di “lachgas’ riba salú di hóbennan kada bes ta kousa mas preokupashon na Fransia, kaminda inkluso un dje ‘chefs’ mas galardoná a lansa un akshon hudisial pa tuma medida. Yanick Alleno, ganadó di 18 strea Michelin, a primintí na traha pa mas protekshon di hóbennan, despues ku den 2022 un shofùr a trapa su yu mortalmente na Paris. Ayera el a lansa krítika fuerte kontra produktornan di oksido nitroso, di kua su mal uso a provoká mas ku 450 aksidente di tráfiko grave na Fransia den 2025. Esei ta kuater biaha mas ku komo seis aña pasá.
‘Lachgas’ ta un produkto ku meta médiko òf alimentisio, pero hopi ta us’é komo algu rekreativo, inhaland’e ku uso di blas.
“E kos akí tin efekto importante riba salú públiko. Tin hóbennan ku no por a move, otronan a sufri kemadura i aksidente dor di su uso. “Mi ta kere ku ta momento pa tuma medida”, segun Alleno.
E produkto ta provoká daño na sistema nèrvioso, un alterashon di fakultatnan kognitivo, komo tambe problema di ekilibrio i di refleho.
Hospices Civiles, na Lyon, den novèmber di 2024 a lansa un servisio di informashon i tratamentu di efektonan di ‘lachgas’, ku ta atendé desena di pashènt. E mal uso dje gas ta preokupá gobièrnu, ku na komienso dje luna aktual a lansa un kampaña ku mensahe manera: “Despues di algun sekònde di euforia, por surgi un parálisis pa bida largu, òf pió ku esei, bo morto”.
Otro luna Parlamento franses lo trata un proyekto di lei pa kastigá e uso di ‘lachgas’ ku te hasta un aña di prizòn i multa di 3.750 euro, kastigu ku lo oumentá na 3 aña i 9.000 euro si manehá outo bou di efektonan dje produkto.
