WILLEMSTAD.- Kastigunan fuerte por kai pa delitonan kometé den pandemia di COVID-19, kaminda kastigu di 4 aña máksimo por kai òf 25 mil florin di but.
Djaluna último, dia 1e di mart Ministerio Públiko a presentá e promé kasonan den korte ku ta trata violashon di e reglamentu di COVID-19.
Durante e seshon den korte dos doño di restorant mester a responsabilisá nan mes pa violashon di diferente regla, di kual un di e restorantnan aki, riba dos diferente anochi a keda habrí demasiado lat.
Banda di esaki tambe a atendé kasonan di dos trùk di pan i dos persona ku no a kumpli ku e toke de keda.
Den tur kaso ku e sospechosonan a presentá, nan a wòrdu kondená dor di hues.
Ministerio Públiko ta satisfecho ku e resultado i lo trese mas kaso di COVID-19 dilanti hues.
E forma kon OM ta traha den e kasonan aki ta promé ku e sospechoso presentá den korte, Ministerio Públiko ta ofresé e posibilidat di evitá esaki dor di paga un transakshon. Si e suma aki no wòrdu pagá, e persona ta haña un dagfar i si e keda kondená e ta haña un anotashon riba su tarheta penal. Riba delitunan di COVID-19 tin un kastigu di prisòn di máksimo di 4 aña òf un but di 25.000 NAF.

LAGA UN KOMENTARIO

Please enter your comment!
Please enter your name here