‘AOV ta un derecho, no un fabor’
WILLEMSTAD.- For di 2021 grandinan tin derecho pa lei pa haña indeksashon di nan AOV, ku awe mester suma 1.050 florin i no 1.000 XCG. Gobièrnu di MFK ta skonde tras di Ofisina Sentral di Statistik (CBS), ku no por kalkulá e kresementu ekonómiko di ougùstùs pa ougùstùs, pa keda sin indeksá e penshun segun e lei di AOV. Asina lider polítiko di partido MAN, Giselle Mc William ta duna di konosé.
E ta mustra ku si di bèrdat tin boluntat polítiko di gobièrnu Pisas pa duna penshonadonan loke nan tin derecho riba dje, por laga entre otro Banko Sentral di Kòrsou i St. Maarten, Ministerio Ekonómiko huntu ku Ministerio di Finansa hasi e kalkulashonnan nesesario pa yega na e sifra di kresementu ekonómiko. Segun Mc William e gobièrnu a demostrá ku ora tin boluntat polítiko ta logra hasi kosnan.
Un ehèmpel di esaki ta pago di plaka di fakansi promé ku e fecha stipulá pa lei, segun Mc William. “Banda ku esaki tin un impakto positivo pa e ámtenar, tabata tin boluntat polítiko pa hasi e pago mas trempan.” Na su opinion meskos ta konta pa indeksashon di e AOV ku tin un impakto positivo riba entrada di penshonadonan.
“Ke men si tin boluntat polítiko di bèrdat pa sòru pa nos grandinan, mester por sòru pa nan derecho riba indeksashon di AOV, sin skonde tras di fecha pa kalkulashon di e sifra di kresementu ekonómiko, mirando ku pa pago di plaka di fakansi di ámtenar tampoko a skonde tras di e fecha di pago. Despues di 6 aña di gobernashon di gabinete Pisas, e minister di Desaroyo Sosial, Labor i Bienestar (SOAW) ta bisa ku AOV a subi te 1.000 florin. Lokual e no ta bisa ta, ku e subida aki no ta un fabor sino un derecho ku grandinan tin ku ta ankra den lei, i ku te awe no a kumpli ku e derecho manera debe de ser.”
Ta remarkabel tambe, Mc William ta bisa mas aleu, ku te awe Parlamento no a risibí un proposishon di lei pa formalisá e subida di AOV te na 1.000 florin. “E realidat ta bon kla: e subida no ta un mérito di Ministerio di SOAW, sino di penshonadonan mes ku a lucha sin stòp, for di momento ku nos di partido MAN a mustra ku konforme lei e penshonadonan tin derecho riba indeksashon di AOV.” Mc William ta enfatisá ku mientras no indeksá e AOV i tampoko oumentá te na 1.500 florin manera primintí e lucha di partido MAN no a kaba.
“AOV ta un derecho, no un fabor”, e lider polítiko di MAN ta finalisá bisando.
