Yael Plet:
WILLEMSTAD.- Na 2021, momento ku Gabinete Pisas II a tuma asiento, tambe a publiká un dekreto nashonal di e repartishon di kartera kaminda por lesa ku Banko di Seguro Sosial (SVB) tabata kai bou di minister di Salubridat, Medio Ambiente i Naturalesa (GMN). Pues, un situashon igual ku na 2017 ku minister aktual Javier Silvania ta referí na dje. Asina kolaboradó di frakshon di MAN-PIN, Yaël Plet, ta duna di konosé.
Silvania ta indiká ku Plet no ta papia e bèrdat ora e ta indiká durante entrevistanan radial ku èks minister Suzy Camelia-Römer no tabatin nada di aber ku SVB. E minister ta basa su mes riba e dekreto nashonal ku ta indiká ku na 2017 SVB tabata kai bou di minister di GMN. “Pues a base di e lógika di Silvania, ministernan di GMN pa MFK tampoko no a hasi nada na penshun di behes pasobra tabata ministernan Dorothy Pietersz-Janga i despues Silvania ku tabatin e kartera”, Plet ta deklará pa EXTRA.
E ta bisa ku na lugá di wak dekreto nashonal riba repartishon di kartera, mester wak e lei di seguronan sosial, pa ta mas eksakto e lei di aov (penshun di behes). E ordenansa di lei ta di un órden mas haltu ku e dekreto nashonal riba repartishon di kartera, Plet ta splika. Algu ku èks minister Ruthmilda Larmonie-Cecilia tambe a deklará siman pasá na EXTRA.
Plet ta mustra ku den e ordenansa di lei bou di e kabes “Algemene Bepalingen” kapítulo 1, artíkulo 1, ta stipulá ku ora den e teksto di e lei ta referí na minister ke men e minister di Desaroyo Sosial, Labor, i Bienestar (SOAW). “Pues ni maske a disidí ku ta pone SVB bou di minister di GMN na 2017, pa lei ta minister di SOAW ta esun ku por tuma desishon relashoná ku e fondo di aov”, Plet ta bisa.
Konseho
Relashoná ku e echo ku ainda no a tuma desishon riba oumento di penshun di behes apesar ku Kòrsou a konosé kresementu ekonómiko real pa 3 aña kaba, ta mustra mas aleu riba un konseho di Konseho di Konsulta (“Raad van Advies”, RvA) riba e nota di kambio riba presupuesto 2024. RvA a konsehá gobièrnu di Kòrsou pa splika dikon ta skohe pa pa garantisá penshun di 25 mil asegurado di e kompania di seguro ENNIA i no ta skohe pa alabes oumentá penshun di behes. Konforme e lei mester oumentá e penshun di behes na momento ku tin kresementu ekonómiko real.
Den e nota di kambio gobièrnu a para ketu na loke e ta yama ‘e problemátika di ENNIA’. Ta indiká ku Banko Sentral di Kòrsou i St. Maarten, huntu ku gobièrnunan di Kòrsou i St. Maarten a yega na un solushon ku lo kosta pa máksimo 30 mion florin pa aña durante 30 aña largu. RvA ta bisa ku ta un eskoho di maneho di gabinete MFK/PNP pa pone 900 mion florin disponibel pa garantisá 100 porshento di e penshun di e aseguradonan di ENNIA.
Alabes RvA ta bisa ku e mesun gobièrnu di MFK/PNP ta skohe pa no sigui puntonan di salida di SVB pa kumpli ku e lei di aov i indeksá e penshun di behes a base di kresementu ekonómiko real. Pa e motibu akí RvA a urgi gobièrnu pa splika e diskrepansia den maneho akí. Segun gobièrnu no por kompará e situashonnan ku otro, esta e konsekuensianan sosial-ekonómiko pa penshonadonan ku tin solamente un penshun di behes, debí ku no ta indeksá e aov, no ta di kompará ku e konsekuensianan sosial ekonómiko i polítiko si laga e kompania di seguro ENNIA bati bankarota.
Segun gobièrnu no ta bai solamente pa prinsipionan di igualdat i konsekuensianan sosial ekonómiko, pero tambe pa situashon finansiero ekonómiko i di maneho públiko di pais. E tempu ei gobièrnu a bisa di tin e situashon di penshonadonan na pechu i pa e motibu akí a eliminá e rebaho ku ta apliká riba aov loke a resultá ku mil kobradó di aov a haña 129 florin pa luna èkstra.
Foto:
…Yaël Plet…
