Potrèt: Pronóstiko di wer pa 7 dia
WILLEMSTAD. – Servisio Meteorológiko Kòrsou a publiká datonan mensual di temperatura, áwaseru i velosidat di bientu durante luna di febrüari. E midimentu a tuma lugá na Aeropuerto Hato Kòrsou.
Pa loke ta trata e resultadonan t’asina ku pa loke ta e temperatura, e promedio tabata un tiki mas kalor ku ‘normal’, pero tiki mas fresku kompará ku aña pasá.
Pa loke ta trata e kantidat di áwaseru, t’asina ku e ta un poko mas tantu ku normal i velosidat di bientu un tiki bou di normal.
E datonan ku balor ‘normal’ a keda midí durante un periodo di 30 aña, entre di 1991 pa 2020. Riba e gráfiko ku ta kompañá e relato akí, por haña un bista di e sifranan.
Pa loke ta trata e tempu pa awe, t’asina ku shelu ta tiki te parsialmente nublá i kualke áwaseru lo ta di poko importansia.
Temperatura máksimo lo alkansá 31 ºC i temperatura mínimo 25 ºC. Bientu lo ta generalmente ost ku un brisa suak te moderá; forsa 2 te 4 (12 te 30 km/ora, 7 te 16 nudo). Ménos fuerte den anochi.
Kondishon di laman ta generalmente trankil ku altura di olanan serka di 1 meter (entre 2 i 4 pia).
Situashon general ta indiká ku tempu riba region lo ta leve te parsialmente nublá, ya ku un preshon haltu ta kombiná ku ambiente relativamente seku pa asina sòru pa wer seku prevalesé den e área di nos isla durante e siguiente dianan.
E perspektiva te djabièrnè atardi, ta shelu lo ta parsialmente nublá ku chèns leve pa algu di áwaseru lokalmente.
