Nos tabatin e plaser di a mira Edsel Meulens debutá den e organisashon di deporte ku mas nos ta stima ku RKSV Sithoc. Edsel a debutá ku Sithoc den Stadion di Rif den añanan ’70. Mi ta kalkulá 1974/1975 mas o ménos..
…El a hala atenshon mesora…
Edsel ya for di den su promé wega ku Sithoc den stadion di Rif a hala atenshon pa su ánimo i energia ku e ta hinka den e wega. Un hóben fuerte riba pia ku no tabata stòp di kore, dispuesto semper pa laga tur su energia riba tereno.
…For di Sithoc Hubenil…
Edsel a subi ku Sithoc despues di hunga den un elenko fuerte di Sithoc hubenil ku tabata konsistí di vários futbolista ku despues a bira strea den Sithoc manera: Carlos Simon, Michael Bonquer, Tico Sambo, Lionel Mathilda, Stanley Gijsbertha, “Combi” Wilson, “Nooi” Girigorie, Ronald Braafhart, Charlie Regales i Socrates Antonia.
…Su pashon pa e deporte…
Edsel su pashon pa e deporte a pone ku no a dura hopi ku el a bira un pilar dje kolegialnan di Sithoc. El a sirbi komo mèntòr pa masha hopi futbolista hóben di Sithoc, su manera fuerte di hunga i ánimo kontagioso a kontagiá muchanan manera: Upe Dorothea, Derrel Dorothaal, “Ton” Rovina, “Monchi” Rovina, Glenn Kwidama, Hensley Geertruida, Hensley Ignacio, “Chelo” Pisas i masha hopi otro. Edsel tabata “Leon” riba tereno.
…Hunga fuerte !!!…
E tabata instruí su kompañeronan mas hóben pa hunga fuerte. Aunke ku no tantu estatura, Edsel no tabatin “miedu” di nada!! Si kualke hungadó di Sithoc hañ’é den un konfrontashon riba tereno, mesora Edsel tabata yega serka, sea pa plakia kos o pa defendé su “muchanan”. (Aki ta kandela/wega di hòmber.)
…Eksperensia di “Nooi” ku Edsel…
Norman, “Nooi” Girigorie a lanta huntu ku Edsel den hubenil di Sithoc, i a eksperensiá Edsel komo futbolista den Sithoc siendo DT i tambe komo su asistente. Norman ta bisa:”Edsel tabata duru riba pia. Nos tur tabata stima Edsel. E tabata entregá tur kos riba tereno, semper ku hopi determinashon”. E DT mas eksitoso den istoria di nos deporte Rei ta rekordá ku Edsel semper riba tereno tabata hala atenshon di tur hungadó ku futbòl ta wega di hòmber. I tabata añadí, ”Aki ta kandela !!”…Edsel a asistí “Nooi” Girigorie tempu ku e tabata DT, fuera di esei e tabatin hopi éksito entrenando hubenil di Sithoc.
…Gol istóriko di Edsel…
“Nooi” Girigorie nunka mas ta lubidá un gol ku Edsel a hinka ku kabes drentando den wega vs Centro Dominguito den e un stadion di Subt (Kintjan) lata lata ku a manda Sithoc final vs Victory Boys. “M’a bisa Naldo Karel pa avisá ora tabata falta mas o ménos 25 minüt pa wega finalisá. M’a konvensé DT Jose Rodriquez Neto pa nos hinka Edsel komo sentro delantero, aunke e tabata un defensa. A instruí Edsel pa e hala poko atras, i ora e bala bini di haltu e kòp. Esei ta loke a sosodé tambe.
…Gol pa manda Sithoc final…
“Ton” Rovina a kobra un tiru liber, Edsel a keda poko atras, i bin aden pa vense e kiper strea di Centro Dominguito Indjomar, “Inchi” Pieternella. E gol a pone ku Sithoc a bai final vs Victory Boys pa despues bira kampeon despues di 24 aña na aña 1986.
…”Sapato Viejo”….
E nòmber di kariño di Edsel ku ta “Sapato Viejo” el a haña serka e DT brasileño di Sithoc José Rodriguez Neto.
…Edsel vs Wilhelm Canword…
Un anékdota di Edsel ku sin duda lo pone tur ku ta stima futbòl di ántes i frekuentá stadion hari ta un wega entre Sithoc vs Subt. Aunke Wilhelm Canword i Edsel pafó di tereno tabata bon amigu, riba tereno si tabata “kandela”. Subt a yega di trese un futbolista brasileño, i a toka Edsel pa defendé vs e atakante di Brazil. Na sigur tres okashon Edsel a kita bala for di e atakante Barikahel (Brasileño) na momento ku e kier a avansá den direkshon dje arko kolegial. Edsel ku tabata hunga hopi pegá ku e banki di Subt a grita su amigu Wilhelm, “Ma kere ta brasileño, lugá ta brasi lo(2x) ….!!”…Wilhelm tabata kontestá,”Meulens, wak kiko bo ta papia, wak kiko bo ta papia !!”…
…Un amor inkreibel…
Edsel tabatin un amor inkreibel pa su kamiseta. “Nooi” ta konta ku Edsel Meulens su man tin biaha tabata sali for di lugá durante wega. Robby Vicario tabata hinka e man bèk, i Edsel tabata keda den wega.
…Rekonosementu pa Edsel Meulens…
Edsel nunka a buska fama o rekonosementu. E kolegalanan di Sithoc a duna Edsel un bunita plaka di rekonosementu pa su aporte komo tékniko, i tambe hungadó. Tambe e bario di St. Helena a rekonosé Edsel Meulens komo baluarte dje bario pa su aporte na e hubentut dje bario. Entiero di Edsel lo ta awe mèrdia na Iglesia di Wishi.
…Edsel danki. Sithoc lo keda stima bo semper !!…
Edsel a dediká mas ku 50 aña di su bida na Sithoc. E no a hunga den niun otro organisashon. El a trein Sithoc hubenil, i semper tabata fiel na e filosofia dje organisashon fundá pa Frater Andreas ku dia 7 di mart último a selebrá 84 aña di eksistensia. Na nòmber di tur Sithoc, humildemente nos kier a gradisí Edsel pa su aporte na nos organisashon stimá. Edsel Sithoc lo keda stima bo semper !!
Skibí pa: Taffy de Jongh.
