WILLEMSTAD.- VIGOR ta ekspresá su apresio sinsero i gratitut na Promé Minister Gilmar Pisas i Gobièrnu di Kòrsou pa e sosten kontinuo i konfiansa den tantu e kompania komo den e proyekto di desaroyo di término largu, kual tin komo meta pa revitalisá e struktura logístiko i di energia di e isla.
Risibí e akuerdo importante aki ta un punto kulminante importante den avanse di kolaborashon entre, Gobièrnu, VIGOR i 2BAYS. E ta basá riba e akuerdo históriko firmá na yüli 2024, bou di kua VIGOR a drenta un hür di 30 aña pa operá tantu e terminal na Bullenbaai komo e fasilidatnan na Emmastad.
Manera Promé Minister Pisas a indiká, e kolaborashon durante di e último lunanan entre Gobièrnu, VIGOR i 2BAYS ta reflehá e vishon kompartí pa futuro di Kòrsou riba desaroyo di industria sostenibel, kreashon di trabou i revitalisashon di e sektor vital aki.
VIGOR a tuma e operashon di e fasilidatnan na Bullenbaai ofisialmente na desèmber 2024, i na yüni 2025 a yama bon biní na e promé barku. Esaki ta marka un paso importante den reaktivashon di e fasilidat. E kompania ta traha pa aktivamente optimalisá e operashon di e terminal pa almasenahe i aktividat di “blending.”. Ta spera mas yegada di barku den e simannan ku ta bini. Na mes momentu, tin un inventarisashon tékniko, ekonómiko i di medio ambiente ku ta tumando lugá na tantu Bullenbaai komo Emmastad. Esaki mester forma base pa e proyekto su strategia di desaroyo di término largu.
Dor di risibí e konsepto di akuerdo aki, e kompania ta kuminsá negoshá e términonan final di transferensia i kuadro di operashon. Komo invershonista esaki ta representá un fundeshi sólido pa un operashon kompletu.
VIGOR ta inisiá un reaktivashon den fase na Emmastad. Ta kalkulá ku esaki lo tuma un periodo di tres aña i ku lo kulminá den un traspaso kompletu na desèmber 2027. Parti importante den e plan di negoshi, ta entre otro un evaluashon kompletu di medio ambiente, evaluashon tékniko plùs di ingenieria i estudio ekonómiko. E evaluashonnan aki ta kondishon pa por implementá un plan di desaroyo pa Emmastad.
Mirando dilanti, VIGOR ta keda komprometé ku un proseso di desaroyo transparente, responsabel i sostenibel, ku ta sirbi e interes a largo plaso di Kòrsou. E kompania ta dediká na desaroyá e kapasidat di e isla komo un hub regional di energia i logístiko pa Karibe, miéntras e ta krea empleo, desaroyá abilidat i pèrkurá pa resiliensia ekonómiko.
