CARACAS (AFP).- Gobièrnu interino di Venezuela a informá kompanianan di aviashon ku ta operá den e pais ku nan mester depositá sèn di kompra di kombustibel serka PDVSA riba kuentanan di Departamento di Finansa di Merka. E medida aki ta suma na un seri di medidanan finansiero imponé pa Washington, ku ta bisa di ta enkargá ku Venezuela despues di e kaptura den yanüari dje presidente Nicolas Maduro.
Dia 28 di mei, PDVSA a dirigí un karta na kompanianan di aviashon pa “notifiká nan di asuntunan bankario pa pagonan” korespondiente na konsumo di kombustibel pa avionnan, di akuerdo ku un partisipashon firmá pa e gerente di benta di PDVSA. E karta ta kompañá pa un dokumento ku e datonan bankario rekerí pa e transferensianan via di Fedwire, un sistema di pago elektróniko di gran seguridat operá pa Reserva Federal di Merka.
“Gobièrnu di Merka, atrabes di Departamento di Estado, por risibí fondonan norteamerikano den nòmber di Venezuela mediante Fedwire siguiendo e siguiente instrukshonnan”, segun e teksto ta bisa. “E depósitonan mester ta riba nòmber di Departamento di Finansa di Merka na New York” , segun por a lesa mas aleu. Fuente di un otro aerolínea a konfirmá ku nan tambe a risibí e karta.
Den último lunanan e konekshon aéreo di Venezuela a bolbe haña bida, despues ku anteriormente Donald Trump den luna di novèmber a dekretá ku ta sera e espasio aéreo venezolano durante dje presensia militar norteamerikano den Karibe, ku a kondusí na e kapturá di Maduro. Venezuela na e momento ei tabata un pais aislá despues ku mayoria kompania grandi di aviashon a stòp di bula pa Caracas pa motibu di debenan grandi di parti di gobièrnu dje pais.
