Lidernan europeo a reuní ayera na e siudat finlandes di Rovaniemi pa diskutí kon pa yuda protehá Noordpool, sigur despues di menasanan di Donald Trump relashoná ku Groenland.
HELSINKI, Finlandia (AFP).- Ayera diesdos pais a hasi un apelashon riba Union Europeo pa reforsá su presensia den Noordpool pa asumí “un papel mas stratégiko i mas proaktivo” den un region marká pa tenshonnan geopolítiko, e menasanan ruso i e aspirashonnan di Donald Trump. “E seguridat den Noordpool mester keda garantisá”, segun e paisnan a defendé, entre nan Fransia, Dinamarka i Suesia, den un deklarashon konhunto na final di un kumbre ku a tuma lugá na Rovaniemi, Finlandia.
Den luna di yanüari último, presidente norteamerikano a menasá na hasi uso di forsa pa poderá di Groenland, un isla ártiko i teritorio outónomo danés enorme, loke a provoká un krísis grave entre e aliadonan oksidental. Despues di esei, e tenshon entre europeonan i norteamerikano a baha un poko. Pero e dirigentenan europeo no a lubidá dje menasa ei i awor ke studia fórmulanan pa reforsá nan presensia den e region, konsiente tambe dje presensia di un Rusia hostil na e otro banda dje frontera finlandes largu .
Pa e paisnan aki, Mòsku ta representá´un “menasa importante i duradero” pa seguridat. Entre e presentenan na Rovaniemi, un siudat finlandes konosí pa ta e residensia di Papa Pasku, a figurá kansier aleman, Friedrich Merz, i Promé Minister danes, Mette Frederiksen. Tambe a tuma parti dirigentenan di paisnan ku no tin interes dirèkt den Noordpool, manera e presidente rumano Nicuor Dan.
E meta ta pa demostrá ku “loke ta pasa aki no ta un asuntu regional. Ta un kuestion europeo”, segun e presidente di Konseho Europeo, Antonio Costa.
E interes pa Noordpool a oumentá di forma konsiderabel for di e adopshon den 2021, di e último polítika di Union Europeo dediká na e region. Despues di menasanan di Donald Trump den yanüari, di kua e no a hala’tras kompletamente, NATO (The North Atlantic Treaty Organization) a kuminsá traha riba un mishon destiná pa reforsá e seguridat den Noordpool.
