PARIS, Fransia (AFP).- Sigur shete pais europeo a trese kambio den nan reglanan pa biaha pa Merka, despues dje kambio di e polítika migratorio di Washington i un seri di insidente den kua bishitantenan estranhero a keda detené òf deportá.
Fransia a uni su mes na Alemania, Dinamarka, Finlandia, Reino Uní, Islandia i Noruega, ku a avisá nan siudadanonan pa tene hopi prekoushon den kaso ku nan ta biaha pa Merka. E atvertensianan a surgi despues di un seri di insidente ku a afektá siudadanonan aleman, franses i britániko, despues dje kambio den polítika migratorio dje presidente Trump.
E Ministerio di Relashonnan Eksterior ta rekordá nan siudadanonan riba reglanan estrikto pa drenta Merka i ta pone atenshon riba e punto ku ta solamente outoridatnan norteamerikano ta disidí na último momento riba atmishon dje biahero òf no, esei ounke tur dokumento ta bálido.
Vários pais tambe a disidí na referí na e dekreto presidensial di Trump relashoná ku género: Merka ta rekonosé solamente dos sekso: maskulino i femenino. Esaki ta keda definí na nasementu, loke ta eliminá e sekso “X”.
Na Fransia gobièrnu no a menshoná ku transgéneronan franses por keda rechasá si nan tin X den nan pasport. Pero ta rekomendá nan pa “verifiká e kambionan òf e medidanan nobo adoptá. “Partikularmente pa e solisitut nobo di visa òf ESTA (outorisashon elektróniko di biahe), komo ku a agregá un sekshon -segun dekreto presidensial di 20 di yanüari di 2025- pa indiká “sekso na nasementu”. Tur e paisnan ariba menshoná ta asentuá e parti di género.
