Un mucha muhé palestino ta dekorá un palu di Pasku den un misa katóliko den siudat di Gaza. Israel a bisa di lo habri un solo salida pa palestinonan por bandoná e área.
RIAD, Saudi Arabia (AFP).- Mediadónan di Egipto i Qatar, i otro seis pais di mayoria musulman, a ekspresá nan preokupashon pa e anunsio di Israel di lo no habri un paso di frontera den un direkshon na Rafah pa e palestinonan por sali for di e strook di Gaza. Den un deklarashon konhunto, e ministernan di Relashonnan Eksterior di Egipto, Indonesia, Jordania, Pakistán, Qatar, Arabia Saudita, Turkia i Emiratonan Árabe Uní a ekspresá nan “preokupashon profundo pa e deklarashonnan di parti di Israel riba e apertura dje paso fronteriso di Rafah den un solo direkshon ku e meta pa trasladá e residentenan for di Gaza pa Egipto”.
E kansiernan a ekspresá “nan rechaso total na kualke intento pa saka e pueblo palestino for di su teritorio” i a bisa di ta kontra pa “obligá e residentenan di e strook di Gaza pa nan bai”. Nan ta urgi pa habri e kruse den dos direkshon di akuerdo ku e plan di presentá pa e presidente di Merka, Donald Trump.
Israel ayera a anunsiá e reapertura “den próksimo dianan” dje paso di Rafah, den e ekstremo zùit dje teritorio palestino. E medida lo keda apliká”solamente pa e salida” di abitantenan di Gaza pa Egipto, segun COGAT, e organismo di ministerio di defensa ku ta supervisá e aktividatnan sivil den e teritorionan palestino.
Egipto a nenga di a aseptá e medidanan ei, i ta para riba ku e kruse stratégiko mester keda habrí den tur dos direkshon. E reapertura dje kruse di Rafah ta den kuadro dje plan di pas pa e teritorio palestino, i ta keda reklamá pa tempu kaba di parti di agensianan di Nashonnan Uni i organisashonnan humanitario. Pero for di despues ku a kuminsá ku e akuerdo di pas den Gaza dia 10 di òktober, outoridatnan israelí no a hasi esei, argumentando ku no a entrega kurpa di tur e rehennan manera a primintí i tambe e nesesidat di kordinashon ku Egipto.
