ISLAMABAD, PAKISTAN, AP.- Un senador pakistani prominente a ekspresá su desepshon pa desishon di Merka, di suspendé tur yudansa militar pa Pakistan. El a indiká ku esaki lo perhudiká e relashonnan bilateral, miéntras e propio gobièrnu a bisa ku tabata demasiado pronto pa evaluá e efektonan di e desishon.
E presidente di komishon di asuntu eksterior di kámara di Parlamento, Nuzhat Sadiq, a bisa ku Islamabad por riesgá sin Merka manera esaki a hasi na dékada 1990, pero e pais ta preferá pa ámbos gobièrnu superá nan problemanan mutuo.
“Loke Merka ta hasiendo no ta bon pa su polítika kontra terorismo ni pa un pas duradero den e region”, asina el a bisa. El a agregá ku Pakistan semper a “hunga un ròl vital den guera kontra terorismo”.
Djaweps, departamento di Estado a emití un deklarashon kaminda esaki a akusá Pakistan di no tuma ‘medidanan desisivo’ kontra milisianonan taliban ku a ataká Merka den bisiña di Afganistan. E funshonarionan merikano a keha ku Pakistan ta tolerá òf asta enkurashá ekstremistanan, algu ku Islamabad ta ninga.
Kasi 24 ora despues di e anunsio di suspenshon di yudansa militar, e Ministerio di Relashon Eksterior di Pakistan a emití un deklarashon kaminda el a bisa ku ta demasiado pronto pa sa ki impakto esaki lo tin pa e desishon di Merka riba inisiativanan antiterorista den e region. Sinembargo, el a agregá ku e guera kontra terorismo, ku ta drentando den su di diesshete aña, a kosta Pakistan mas di 120.000 mion dòler.
